Seinasta hendingin var leygarkvøldið í Berlin, har ein persónur doyði og minst 17 vórðu særd, tá ein bilur koyrdi inn í fólk undir Pride-tiltakinum Christopher Street Day.
Her er eitt yvirlit yvir álvarsligu hendingarnar:
Berlin, juli 2026 – Pride-gonga
Ein persónur doyði og minst 17 vórðu særd, fleiri álvarsliga, tá ein bilur koyrdi inn í eina mannamúgvu í Tiergarten. Løgreglan hevur eyðmerkt ein illgrunasaman persón, sum framvegis er leysur. Sambært løgregluni er hann kendur av myndugleikunum og hevur tilknýti til islamistiska umhvørvið. Motivið er framvegis ókent.
Leipzig, mai 2026 – Gongugøta
Tvey fólk doyðu og trý vórðu álvarsliga særd, tá ein bilur koyrdi gjøgnum gongugøtuna í miðbýnum. Ein 33 ára gamal maður varð handtikin. Sambært myndugleikunum kann hann hava havt sálarligar trupulleikar.
Mannheim, mars 2025 – Fótgangarar
Tvey fólk doyðu og 11 vórðu særd, tá ein 40 ára gamal maður koyrdi inn í ein bólk av fótgangarum. Ákæruvaldið metti, at talan var um eina tilvitaða handling, men ikki við politiskum ella átrúnaðarligum motivi.
München, februar 2025 – Mótmælisgonga
Ein 24 ára gamal afghani koyrdi bil inn í eina fakfelagsmótmælisgongu. Ein kvinna og tvey ára gamla dóttir hennara doyðu, og fleiri onnur vórðu særd. Ákæruvaldið metir, at álopið hevði islamistiskt ekstremistiskt motiv.
Magdeburg, desember 2024 – Jólamarknaður
Seks fólk doyðu og meira enn 200 vórðu særd, tá ein bilur koyrdi inn í jólamarknaðin. Ein saudiarabiskur maður varð seinni dømdur lívlangt fongsul. Sambært ákæruvaldinum hevði hann antiislamskar og høgravendar hugsjónir.
Berlin, juni 2022 – Handilsøki
Ein 29 ára gamal maður koyrdi inn í eina mannamúgvu. Ein lærarinna doyði, og 14 næmingar hennara vórðu særdir. Myndugleikarnir mettu, at maðurin møguliga hevði paranoid skizofreni.
Trier, desember 2020 – Gongugøta
Fimm fólk, teirra millum eitt níggju vikur gamalt pinkubarn, doyðu, tá ein rúsaður 51 ára gamal maður koyrdi gjøgnum gongugøtuna. Minst 15 onnur vórðu særd.
Volkmarsen, februar 2020 – Føstulávintsgonga
Ein maður koyrdi bil inn í eina føstulávintsgongu. Fleiri enn 20 børn vóru millum tey særddu. Maðurin varð seinni dømdur lívlangt fongsul.
Berlin, desember 2016 – Jólamarknaður
Ein tunesiskur maður, sum hevði fingið sýtt umsókn um friðskjól, kapraði ein lastbil og koyrdi inn í ein jólamarknað. Hann drap fyrst lastbilføraran og síðan 11 fólk á marknaðinum. Hann varð skotin til deyðis av italienskari løgreglu fýra dagar seinni.
Kelda: Reuters.
