Í undanumrøðuni royndu tey í HB í vikuni at eggja viðhaldsfólkum at møta upp, nú plássið í næstbestu deildini stóð upp á pláss.

Treytin, fyri at tað skuldi eydnast at sleppa undan at flyta niður, var, HB vann úrtøku og helst øll trý stigini ímóti grannunum í B36.

Men soleiðis gekk tað als ikki.

B36 vann 6-0, og tað ber við sær, at næstbesta liðið hjá HB endaði á 9. plássi og flytur niður í 2. deild. Úrtøkan hjá HB var 25 stig, og B36 endaði við 35 stigum. Um tað fer at bera sætta ella fimta plássið við sær fæst at vita í morgin, tá ið TB fær vitjan av B71.

Bara fimm minuttir vóru farnir, tá ið B36 legði seg á odda, og tá ið B36 áðrenn eitt korter var farið økti um munin til 2-0, var spurningurin bara, hvussu stórur sigurin fór at verða.

Síðstu lítlu løtuna undan steðginum skoraði B36 tvey mál aftrat, fýra minuttir eftir steðgin varð 5-0 og tveir minuttir undan leikloki staðfesti innskifti Emil Hansen 6-0 sigurin. Hetta var aðru ferð í ár, at hann var málskjútti í 1. deild.

Jeremiah Mensah Okome setti hol á. Hetta var sjeynda málið hjá honum í 1. deild í ár.

Magnus Næs var tvífaldur málskjútti. Hann skoraði til 2-0 og 4-0, og til saman skoraði hann fimm mál í ár.

Hini bæði málini skoraðu Pætur Akselsen og Tyrni í Sjúrðagarði. Teir skoraðu í ár ávikavíst eitt og tvey mál.  

Í Runavík vann Víkingur 1-0 ímóti NSÍ.
Fríði Gertsson Jarnskor skoraði málið miðskeiðis í seinna hálvleiki. Sigurin bar við sær, at Víkingur endaði næstfremst.

Í Hólmanum á Eiði vann FC Hoyvík 1-0. Málskjútti miðskeiðis í fyrra hálvleiki var Herman Nolsøe.

Felags fyri bæði NSÍ og FC Hoyvík var, at tey undan síðsta umfari vóru í vanda fyri at flyta niður. Hóast bæði liðini taptu, so vera tey eisini í 2027 í 1. deild.

Í morgin

ÍF – FC Suðuroy: Arnar Lognberg kl. 15.45

TB – B71: Niklas Petersen kl. 15.00