- Tað vóru teir, sum vóru møttir til arbeiðis um 02-tíðina í nátt, sum boðaðu frá, at eldur var í bygninginum, sum eitt nú hýsir kantinu, skrivstovu, skiftirúmi, wc, brúsu og øðrum.
Tað sigur Atli Gregersen, stjóri í Hiddenfjord um eldin, sum herjaði á økinum hjá alifelagnum á Gomlurætt í nátt.
Hann vísir á, at eldurin kyknaði stutt eftir, at fólk vóru komin til arbeiðis á blóðgistøðini úti á bryggjuni á Gomlurætt.
Bygningurin, sum eldur kom í, stendur innari á økinum.
- Bygningurin er ein sokallað bingjuloysn, sum er sett saman av fleiri bingjum, og eg haldi meg kunna siga, at her er alt farið upp í royk.
Atli Gregersen vísir á, at onkur útbúnaður, sum stóð á økinum nærindis bingjuloysnini, eitt nú ein trukkur, eisini sær út til at vera farin.
- Ein alinót var eisini á økinum, og vit vita ikki við vissu í løtuni, um hon er oyðiløgd.
Spurdur, um samlaði skaðin snýr seg um milliónir, heldur stjórin í Hiddenfjord fyri, at talan helst er um nakrar fáar milliónir, sum hann tekur til.
- Eingin var í bygninginum, tá eldurin kyknaði, og eg dugi ikki at siga, hvør orsøkin kann vera, men onkusvegna hugsar tú um, at talan kann vera um el.
Atli Gregersen leggur tó dent á, at enn er einki staðfest, og her skulu kanningar gerast, áðrenn orsøkin til eldin kann staðfestast.
- Vit eru næstan lidnir at taka fiskin, sum skal takast í alibrúkinum út fyri Velbastað, og her ætla vit at seta fisk útaftur um einar tveir mánaðir.
Stjórin í Hiddenfjord leggur aftrat, at felagið nú noyðist at útvega sær nýggjar fasilitetir á landi, sum í eldinum í nátt fóru upp í royk.
