Føroyska tónlistakvinnan Fríða Saiya varð í gjárkvøldið kosin størsta nýggja tónleikastjørnuskotið í Danmark, tá P3 Guld-heiðurslønirnar vórðu handaðar í DR Konsertsalinum í Keypmannahavn.
Fríða Saiya, sum í veruleikanum eitur Fríða Vágsheyg Sigurðsson, er 21 ára gomul. Hon er uppvaksin í Keypmannahavn, men hevur føroyskar røtur í Klaksvík.
Tað var kenda danska tónlistakvinnan Oh Land, sum handaði henni heiðurslønina P3’s Næste.
Fríða var sjónliga ovfarin, tá hon tók ímóti heiðrinum.
– Eg eri sjokkerað, tí hetta hevði eg ikki væntað, segði hon.
Heiðurin P3’s Næste, sum áður kallaðist KarriereKanonen, verður latin einum nýggjum tónleikanavni, sum hevur serliga góðar møguleikar at sláa ígjøgnum á danska tónleikapallinum.
Vinnarin verður valdur av einari dómsnevnd og lurtarunum hjá P3, sum hvør hava helvtina av avgerðarrættinum.
Í grundgevingini fyri at velja Fríðu Saiyu verður serliga dentur lagdur á hennara tónlistaligu evni, sterku løg og sermerkta poppljóð.
Dómsnevndin, har eitt nú kendu donsku tónlistafólkini Andreas Odbjerg og Jada sita, heldur, at Fríða hevur eitt serliga stórt tónlistaligt medvit og eitt eyðsýnt talent.
Fríða hevur skrivað tónleik, síðan hon var 12 ára gomul, og hevur nú givið sína fyrstu EP út.
Hóast hon er uppvaksin í Danmark, hevur føroyska málið og samleikin stóran týdning fyri hana.
Foreldrini eru Birgir Sigurðsson og Hanna Vágsheyg úr Klaksvík, og Fríða tosar flótandi føroyskt við norðoyamáli.
Í samrøðu við Kringvarpið hevur hon greitt frá, at listafólkanavnið Saiya er sett saman úr bókstavum í eftirnøvnunum Vágsheyg og Sigurðsson. Hon valdi navnið, tí plátufelagið ynskti eitt navn, sum var lættari hjá dønum at úttala.
Við heiðrinum P3’s Næste hevur Fríða Saiya nú fingið eina týðandi viðurkenning á danska tónleikapallinum.
Á somu heiðurslønahandan vann danska tónlistakvinnan Annika høvuðsheiðurin P3 Prisen.
Kelda: Kringvarp Føroya/DR
Myndatekstur: Fríða Saiya tekur ovfarin ímóti heiðrinum P3’s Næste frá donsku tónlistakvinnuni Oh Land á P3 Guld-heiðurslønahandanini í Keypmannahavn fríggjakvøldið. Mynd: Lasse Lagoni.
