Faroe Sheep er lutfalsliga nýggjur handil, sum húsast í kjallaranum á Giljavegi 36 í Sandavági.
Handilin liggur beint við høvuðsvegin í Sandavági - til og frá flogvøllinum, og tí er lætt og ómakaleyst hjá fólki, sum eru um hesar leiðir, at støkka innar og síggja forvitnisliga úrvalið.
Upprunin til handilin er felagið Oikos, sum hevur sínar røtur í Bø.
Í nógv ár hevur Oikos tikið ímóti seyðaskinnum til útflutnings. Felagið letur eisini seyðaskinn garva, og burtur úr føroysku rávøruni fáast vakrastu skinnini í ymiskum litum og samansetingum og flottastu vørurnar.
Í Faroe Sheep hava tey eitt gott úrval av ymiskum skinnvørum í sera høgari góðsku.
Her fært tú í fyrsta lagi garvað seyðaskinn, men her eru eisini pútur, gestabøkur og ymiskt annað - alt virkað úr føroyskum seyðaskinnum.
Útlendingar og føroyingar
- Øll seyðaskinn eru serstøk, og í handlinum hjá okkum gera vit alt fyri, at tú sum kundi altíð fært júst tað rætta skinnið ella skinnvøruna.
Tað sigur Elisabeth Aaen Nordendal, sum er dagligur leiðari í Faroe Sheep í Sandavági, sum læt upp fyrstu ferð á vári í 2025.
- Vit hava soleiðis havt opið tvær háárstíðir, og vit síggja, at fleiri og fleiri vita um handilin og støkka inn á gólvið - eisini føroyingar, sum vilja síggja okkara vørur.
Handilsleiðarin vísir á, at í summarhálvuni eru tað serliga útlendsk ferðafólk, sum vitja, men tey lokalu og føroyingar annars eru eisini ófør at keypa virkaðu føroysku vørurnar.
- Vit fegnast serliga nógv, tá føroyingar keypa her hjá okkum, tí føroyingar samskifta sínámillum, og hetta ger, at fleiri og fleiri fáa at vita um handilin og forvitnisligu vørurnar hjá okkum, sigur hon.
Ferðaløg eru vælkomin
Í Faroe Sheep í Sandavági hava tey havt fastar upplatingartíðir í háárstíðini, men til ber altíð at venda sær til handilin og biðja um at sleppa inn á gólvið at síggja útboðið.
- Ferðaløg og sjálvsagt ikki minst føroysk ferðaløg eru altíð hjartaliga vælkomin at seta seg í samband við okkum, sigur handilsleiðarin.
Tá vit spyrja, hvørjir litir selja best, er hon slett ikki í iva um, at tað morreyða altíð selur væl.
- Tað er sjálvsagt ymiskt, hvørjum litum fólk spyrja eftir, tí eitt garvað seyðaskinn er altíð vakurt, og tað eru lutirnir, sum eru evnaðir úr garvaðum seyðaskinni, eisini, sigur Elisabeth Aaen Nordendal.
