Danskarar tykjast hava fingið minni hug at keypa frá kinesiska nethandlinum Temu.

Í triðja ársfjórðingi í fjør var Temu nummar trý á listanum yvir nethandlar, sum danir høvdu keypt frá seinast. Í ár er nethandilin dottin niður á tíggjunda pláss.

Tað vísir ein kanning hjá Dansk Industri, sum Epinion ger hvønn ársfjórðing, skrivar Ritzau.

Mie Bilberg, ráðgevi í nethandli hjá Dansk Industri, heldur nýggju tollreglurnar, sum komu í gildi í summar, vera eina sannlíka orsøk til afturgongdina.

Hon vísir á, at tá tollur verður lagdur oman á bíligar vørur úr Kina, kann tað brádliga loysa seg betur at keypa tær í einum donskum handli.

– Tað er eitt stig ímóti, at evropeiskir nethandlar kunnu kappast á jøvnum føti við teir kinesisku, sigur hon.

Meðan Temu missir undirtøku, gongur framá hjá Vinted, har fólk millum annað keypa og selja brúkt klæðir. Vinted varðveitir annaðplássið á listanum.

Týski nethandilin Zalando er framvegis ovast, meðan danski Matas hevur tikið triðjaplássið frá Temu.

/ritzau/