Nú eru tað nakrar vikur síðani, at EB/Streymur venjarin Sigfríður S. Clementsen segði, at tað var neyðugt hjá EB/Streymi at vinna í hvussu so er eitt stig aftrat.

Tað var, tá ið EB/Streymur hevði vunnið 3-2 á útivølli ímóti B68. Tað var meiri enn róð framundir, at nú hevði EB/Streymur við 26 stigum bjargað sær undan niðurflyting.

Sigfríður S. Clementsen helt tá fyri, at tað fór at vera neyðugt at vinna okkurt stigið aftrat, tí tað kund væl fara at vísa seg, at tað ikki var nóg mikið við 26 stigum.

Síðani tá hevur EB/Streymur tapt 3-0 á útivølli ímóti 07 Vestur og 1-0 á heimavølli ímóti HB. Undan dagsins dysti á útivølli ímóti Víkingi var vandi fyri, at EB/Streymur undan síðsta umfari av álvara kundi vera í tungum sjógvi. Í dag endaði tað málleyst millum Víking og EB/Streym. Undan síðsta umfari hevur EB/Streymur 27 stig. B68 er flutt niður, tí toftamenn hava 20 stig og kunnu ikki røkka fleiri enn 23 stigum. 07 Vestur, AB og Skála ÍF hava øll 25 stig, men tað ber ikki til hjá teimum øllum trimum at røkka 27 stigum og harvið EB/Streymi.

Tað kemst av, at AB og 07 Vestur leygardagin hittast á Argjum. Tá ber tað ikki til, at bæði liðini kunnu fáa tvey stig. Málmunurin hjá Skála ÍF er -13. Um skálamenn vinna í hvussu so er eitt stig við Margáir leygardagin, so fara teir ikki at flyta niður. Tað gera teir, um teir einki stig vinna við Margáir, og um tað inni í Vika á Argjum fer at enda javnt millum AB og 07 Vestur.

27. umfar

Leygardagin 31. oktober

KÍ – Víkingur: kl. 15.00

B68 – NSÍ: kl. 15.00

EB/Streymur – Skála ÍF: kl. 15.00

HB – B36: kl. 15.00

AB – 07 Vestur: kl. 15.00