- Endamálið við Newton Føroyar er at menna og reka eitt læringastilboð innan STEM — náttúruvísindi, tøkni, verkfrøði og støddfrøði. Tilboðið verður ókeypis og opið fyri skúlanæmingar úr øllum landinum. Newton-rúmið verður staðsett í nýggju panthøllini hjá IRF í Sandavági.
Soleiðis verður sagt á heimasíðuni hjá Vága kommunu í dag.
Um Newton-konseptið
Eitt Newton Rúm er eitt serútgjørt undirvísingarumhvørvi, har næmingar arbeiða royndarbaserað við veruligum avbjóðingum, har teori og praktiskt arbeiði ganga hond í hond, og næmingarnir kanna, royna, máta og loysa uppgávur við framkomnari útgerð.
- Newton-rúmið kemur ikki í staðin fyri vanligu undirvísingina í skúlunum, men er eitt ískoyti, sum skúlaflokkar kring landið kunnu vitja sum part av teirra undirvísing.
Víst verður á, at Newton-konseptið er mennt av norska felagsskapinum FIRST Scandinavia, sum eisini stendur fyri einum altjóða Newton-netverki. Sambært ársfrágreiðingini fyri 2025 hevur skipanin nátt umleið 609.000 børnum og ungum í 19 londum.
- Newton Føroyar verður fyrsta Newton-rúmið í Føroyum og verður, sum hini Newton rúmini í netverkinum, staðbundið og rikið við lokalari ábyrgd.
Skipan og ábyrgd
Newton Føroyar verður í fyrstu atløgu rikið sum ein verkætlan, við eini samstarvsnevnd sum hevur yvirskipaðu ábyrgdina av verkætlanini, umsitur fíggjarligan stuðul og tekur avgerðir í viðurskiftum, sum viðvíkja Newton Føroyar. Umsitingin av Newton rúminum kemur at liggja hjá Skúlanum á Giljanesi.
- Avtalan er galdandi í trý ár, og verður longd sjálvvirkandi í tvey ár, um eingin partur sigur avtaluna upp, siga tey í Vága kommunu.
Tey, sum undirskrivaðu samstarvsavtaluna vóru Bjarni Prior, borgarstjóri, Vága kommuna, Sigurd L. Lamhauge, stjóri, IRF, Hjalmar Hansen, stjóri, Undirvísingarstýrið og Eyðun Gaard, stjóri, Nám.
