Troels Mylenberg er deyður, 56 ára gamal. Tað váttar familjan fyri TV 2 Fyn.

– Okkara elskaði Troels er deyður. Øll familjan var savnað um hann, tá hann fekk frið. Vit fara altíð at minnast hansara stóra kærleika, hita og ikki minst skemtið, sum hann varðveitti heilt til tað síðsta, skrivar familjan.

Familjan leggur afturat, at sjálvt í svárastu tíðini megnaði hann at fáa tey at flenna.

Troels Mylenberg hevði verið í viðgerð fyri krabbamein og boðaði í september 2025 frá, at sjúkan var burtur. Seinni kom krabbameinið aftur, og hesaferð bar ikki til at lekja tað.

Hann helt tó fram við at arbeiða, so leingi hann orkaði.

Tankarnar og upplivingarnar frá sjúkutíðini savnaði hann í bókina »Skumring«, sum kom út fyrr í hesum mánaðinum.

Troels Mylenberg hevði síðani 2021 verið vertur í stóru tíðindasendingunum hjá TV 2. Frammanundan var hann politiskur redaktørur á støðini, har hann varð settur í starv í 2018.

Áðrenn tað var hann menningarstjóri og ábyrgdarblaðstjóri hjá Jysk Fynske Medier. Hann hevði í nógv ár skrivað um danskan politikk fyri millum annað Weekendavisen, Ekstra Bladet, Berlingske og Fyens Stiftstidende.

Troels Mylenberg búði á Thurø sunnan fyri Fyn. Hann lætur eftir seg konuna Lis og fýra børn.

/ritzau/