Fleiri enn 2.600 sethús, umframt 187 barnagarðar og 138 skúlar í Kiev eru uttan hita í morgun eftir eitt russiskt loftálop.
Og í økinum Kiev, sum er kring høvuðsstaðin, eru 320.000 húsarhald uttan streym orsakað av álopinum.
Tað siga myndugleikarnir í ukrainska høvuðsstaðnum sambært Reuters.
Hitin í Kiev er um frostmarkið í dag.
Ein persónur er deyður í álopinum. Talan er um eina 47 ára gamla kvinnu, sigur guvernørurin í Kiev-landslutinum Mykola Kalashnyk sambært tíðindastovuni AFP.
Harumframt eru 11 fólk innløgd við skaðum.
Álopið varð framt við 40 rakettum og nærum 500 dronum, skrivar ukrainski forsetin, Volodymyr Zelenskyj á sosiala miðlinum X.
Hann skrivar, at álopið framvegis er í gongd leygarmorgunin.
– Fremsta málið er Kiev - orkuverk og sivilt undirstøðukervi. Tíverri hava bumbur rakt, og vanlig sethús hava fingið skaða, skrivar forsetin.
Álopið fekk Pólland at steingja tveir flogvøllir í eystara parti av landinum fyrr leygardagin, samstundis sum Pólland sendi stríðsflogfør á veingirnar.
Tær báðar floghavnirnar Rzeszów og Lublin vórðu latnar aftur leygarmorgunin, skrivar polsku loftferðslumyndugleikarnir á X.
Sambært pólska herinum hava bæði pólsk og sameind lond sent stríðsflogfør í luftina sum avleiðing av russiska álopinum í grannalandinum Ukraina. Tiltakið endaði leygarmorgunin.
Tað hava ikki verið brot á pólska loftrúmið, stendur í fráboðanini.
Russiska álopið hendir eftir fleiri vikur við samráðingum millum ukrainsk, russisk, amerikansk og evropeisk umboð um at enda kríggið í Ukraina.
Og sunnudagin skal Zelensky hitta amerikanska forsetan, Donald Trump, í amerikanska statinum Florida fyri at tosa um gongdina.
– Nógvir spurningar hava verið settir seinastu dagarnar, so hvat er svarið hjá Russlandi til uppskotini um at enda kríggið, sum USA og heimurin hava lagt fram?
– Russisk umboð møta á longum fundum, men í veruleikanum tosa Kinzhal og Shahed teirra søk, skrivar Zelensky og vísir til tað slagið av dronum og rakettum, sum Russland hevur brúkt í seinasta álopinum á Kiev.
/Ritzau/
