Bretland og Frakland lupu í felag leygarkvøldið á eina undirgrundarvápnagoymslu, sum hernaðarligi bólkurin Islamiskur Statur áður hevur brúkt í Sýria.
Tað sigur bretska verjumálaráðið, sambært tíðindastovuni Reuters.
– Hóast ein nágreinilig meting nú er í gongd, so eru fyrstu ábendingarnar um, at álopið eydnaðist, upplýsir ráðið.
Sambært bretsku fregnartænastuni var málið í einum fjallaøki norðan fyri býin Palmyra og varð áður brúkt til goymslu av vápnum og spreingievni.
Bretsku flogførini brúktu Paveway IV stýrdar bumbur til at raka fleiri atgongdartunlar til undirgrundarvirkið. Paveway er ein neyvleikastýrd bumba, sum er laserstýrd og kann raka við stórum neyvleika.
Reuters skrivar, at vesturlendsk flogfør hava verið á patrulju í økinum fyri at forða fyri, at Islamiskur Statur, eisini nevndur Daesh, fær styrki aftur. Bólkurin stýrdi pørtum av Sýria fram til 2019.
Bretska verjumálaráðið leggur dent á, at eingin búði í økinum, og at øll flogfør, sum vóru við, komu aftur í øllum góðum eftir uppgávuna.
– Atgerðin vísir bretsku leiðsluna og okkara avgerð um at standa øksl móti øksl við okkara sameindu fyri at forða fyri, at Daesh (Islamiskur Statur, red.) og tess hættisligu og harðligu hugmyndafrøðirnar fáa fótafesti aftur í Miðeystri, sigur bretski verjumálaráðharrin, John Healey.
Álopið varð framt av bretskum Typhoon FGR4 jagaraflogførum, sum vórðu stuðlað av einum Voyager tangaflogfari undir átakinum. Typhoon FGR4 jagaraflogfør eru eisini kend sum Eurofighter Typhoons og eru framkomin evropeisk stríðsflogfør.
Stutt fyri ársskiftið boðaði amerikanski herurin frá, at 25 fólk úr Islamskum Stati antin vóru tikin til fanga ella dripin í Sýria innanfyri teir seinastu tíggju dagarnar.
Hetta hendi, eftir at tveir amerikanskir hermenn og ein tulkur vórðu skotnir til deyðis 13. desember í Palmyra. USA hevur illgruna um, at Islamiskur Statur stóð aftanfyri álopið.
Sýrisku myndugleikarnir handtóku fimm persónar, sum vóru undir illgruna fyri at hava samband við skottilburðirnar dagin eftir.
Sýriski forsetin, Ahmed al-Sharaa, saman við uppreistrarfelagsskapinum Hayat Tahrir al-Sham, feldi Bashar al-Assad í skjótálop í desember í fjør.
Sýriska stjórnin hevur ikki gjørt viðmerkingar til álopið hjá Bretlandi og Fraklandi.
/Ritzau/
