- Vit hava nú fingið endaligt svar frá Dátueftirlitinum í sambandi við trygdarbrotið, sum rakti kommununa í september 2024. Dátueftirlitið metir, at arbeiðið, sum kommunan hevur framt eftir netálopið, er nøktandi, og hevur ikki fleiri viðmerkingar til málið.
Soleiðis siga tey í Klaksvíkar kommunu.
Lagt verður aftrat, at eftir áheitan frá Dátueftirlitinum hevur kommunan mett um verandi KT-trygd, gjørt eina neyva váðameting og dagført sítt trygdargrundarlag. Haraftrat hevur kommunan endurskoðað sín KT-trygdarpolitikk og styrkt arbeiðið við kunningartrygd og dátuvernd.
- Í endaligu metingini staðfestir Dátueftirlitið, at Klaksvíkar kommuna hevur gjørt eina gjølla og skipaða váðameting og sett tiltøk í verk fyri at minka um váðan fyri, at líknandi trygdarbrot kunnu raka kommununa í framtíðini.
Í Klaksvíkar kommunu verður sagt, at tey framhaldandi fara at arbeiða miðvíst við KT-trygd, dátuvernd og áhaldandi betringum av trygdarstøðinum hjá kommununi, og kommunan fegnast um, at málið nú er lokað.
