Fert tú at ferðast í Føroyum í summar – ella verður tað ein túrur av landinum?
- Í ár fari eg bæði at ferðast í egnum landi, men eisini ein túr til Danmarkar við bili, har ætlanin er at fara ein túr til Týsklands eisini.
Tað sigur Jan Vestergaard.
Sig eitt sindur um tínar ferðaplanir í ár?
- Vit hava bókað okkum eini summarhús á Sandi í nakrar dagar í juli mánaði. Her fara vit at slappa av og njóta børnini, geva teimum nøkur góð minnir, ganga túrar, fiska og vitja bygdirnar í Sandoynni.
Jan Vestergaard vísir á, at familjan hjá damuni eisini eigur summarhús í Saksun, og her fara tey uttan iva at verða nakrar dagar eisini.
- Røturnar hjá okkum báðum eru úr Suðuroynni, her vit hava eini summarhús í Porkeri, sum vit eisini fara at brúka nakað av tí í - serliga, nú jóansøka er í Vági.
Hann sigur, at skjótt verður eisini ullaroyting, og fjøllini skulu gangast.
Hevur tú ferðast í flestu oyggjum í Føroyum – ella er onkur oyggj eftir at vitja?
- Eg havi verið í flestu oyggjunum, men enn mangla tvær, Lítla Dímun og Mykines. Allar hinar havi eg vitjað, men eg havi ikki ferðast í teimum øllum.
Jan leggur aftrat, at hevur man lív og heilsu í 2027, má leiðin ganga til Mykinesar.
Hvønn týdning hevur tað fyri teg at sleppa út at ferðast?
- Tað hevur ótrúliga stóran týdning. Eg hevði ynskt, at eg kundi ferðast meira og sæð meiri av heiminum, men mær dámar alt for væl í Føroyum, og eg havi ringt við at fara, serliga um summarið.
At enda sigur Jan Vestergaard soleiðis:
- Eg hopi eisini, at vit verða raskari at ferðast í Føroyum, tí her er nakað so fantastiskt og vakurt.
