Tað er framvegis ikki greitt, um Gerhard Lognberg verður partur av tingmanning Sambandsfloksins, sum tað annars hevur ljóðað.
Gerhard Lognberg vil einki siga um málið í morgun, men sigur, at vit nokk skulu frætta.
Alfred Olsen, sum er formaður Sambandsfloksins á tingi sigur, at tingbólkurin ikki hevur viðgjørt hetta málið. Spurdur um tey ikki hava fingið eina umbøn frá Gerhardi Lognberg um at koma upp í tingbólkin, sigur hann, at tað hava tey ikki.
– Um so er, so tosar hann ikki við meg, men við formannin ella næstformannin í flokkinum, sigur Alfred Olsen.
Les eisini: Gerhard fær Sambandið aftur á fremsta bonk
www.in.fo/news-detail/news/gerhard-faer-sambandid-aftur-a-fremsta-bonk/
Á løgtingsvalinum 29. oktober í 2011 gjørdist Sambandsflokkurin størsti flokkur. Í løgtinginum er siðvenja, at størsti flokkur situr fremst í tinginum – beint aftan fyri landsstýrisfólkini. Men hóast Sambandsflokkurin var størstur, so fekk Fólkaflokkurin – eins og Sambandsflokkurin, átta tingfólk. Men av tí at Janus Rein er farin upp í Fólkaflokkin, hevur Fólkaflokkuin nú níggju tingfólk. Tí er hann fluttur fram um Sambandsflokkin í tingsalinum.
Um so verður, at Gerhard Lognberg fer upp í Sambandsflokkin, so kann flokkurin soleiðis vinna Fólkaflokkinum neisur og flyta framumaftur, tí tá hevur flokkurin við flestu atkvøðunum eisini hægsta tingfólkatalið í løgtinginum.
