Nú er tað greitt, at tað vera tvey feløg úr høvuðsstaðnum, sum fara at flyta upp úr 2. deild og í 1. deild.
Í fjør flutti HB niður úr næstbestu deildini, og í ár er HB suveranur vinnari av 2. deild. Harvið verður HB næsta ár umboðað í báðum teimum ovastu deildunum.
Kappingin um hitt uppflytingarplássið hevur staðið millum FC Hoyvík, AB og Skála. Í gjár vann FC Hoyvík 5-1 á heimavølli ímóti triðbesta liðnum hjá Víkingi, og so var tað greitt, at FC Hoyvík er endað á næstovasta plássinum og harvið er uppflytari úr 2. deild.
FC Hoyvík flutti í fjør niður úr næstbestu deildini, men steðgurin í 2. deild var bara eitt ár, tí næsta ár verður FC Hoyvík aftur í 1. deild.
