Vanligi føroyingurin er farin at brúka eitt sindur meiri av pengum.
Tað vísir ein uppgerð hjá Hagstovuni yvir innflutningin av ymsum vørum átta teir fyrstu mánaðirnar í ár, aftur ímóti sama tíðarskeiði í fjør.
Uppgerðin vísir, at innflutningurin av vørum til vanliga húsarhaldsnýtslu er vaksin fimm prosent, átta teir fyrstu mánaðirnar í ár, aftur ímóti í sama tíðarskeiði í fjør.
Í hesum sambandi er innflutningurin hækkaður úr 741 milliónum, upp í 775 milliónir.
Men tilsamans stendur innflutningurin annar í stað, tá ið innflutningurin av skipum og flogførum ikki er talt við.
Størsti vøksturin er kortini í innflutninginum av bilum, tí hann er vaksin heili 26 prosent. Í januar til august í fjør, innfluttu vit bilar fyri 137 milliónum, men í sama tíðarskeiði í ár hava vit innflutt bilar fyri 173 milliónir.
Hinvegin er misjavnt, hvussu tað hevur gingist við innflutningurin av vørum til vinnuna.
Innflutningurin av vørum til hav- og landbúnað, er vaksin 13 prosent, men innflutningurin av vørum til fiskavirking er fallin trý prosent.
Innflutningurin av tilfari til byggivinnuna er vaksin seks prosent, men innflutningurin til annan ídnað, er minkaður 2 prosent og innflutningurin av maskinum og amboðum er fallin 22 prosent.
Tilsamans hava vit innflutt fyri 3.490 milliónir átta teir fyrstu mánaðurnar í ár og tá eru skip og flogfør ikki tald við Tað er eitt pikkalítið sindur, ella sjey milliónir, meiri enn í sama tíðarskeiði í fjør, tá ið innflutningurin var 3.483 milliónir.
