Tann 22 ára gamli maðurin, sum er mistonktur fyri skottilburðin í handilshúsinum Field's í Keypmannahavn í gjár, verður framsettur í grundlógaravhoyring í Københavns Byrett nú á middegi okkara tíð.
Tað upplýsir Københavns Politi á Twitter.
Løgreglan upplýsir, at ákærumyndugleikin fer at krevja rættarfundin fyri afturlatnum hurðum.
Um dómarin velur at steingja dyrnar, verður ikki gjørligt at hoyra frágreiðingina hjá skuldsetta manninum, men til ber tó hjá almenninginum at frætta um skuldsetingina ímóti honum.
Københavns Politi hevur frammanundan upplýst, at maðurin er skuldsettur fyri manndráp. Hvørt hann eisini verður skuldsettur fyri annað, er ógreitt.
Trý fólk eru deyð av skottilburðinum, sum var seint seinnapartin í gjár. Fýra onnur hava fingið álvarsligan skaða av skotunum.
Københavns Politi upplýsir í dag, at tríggir persónar eru viðgjørdir fyri møgulig strokskot á staðnum í gjár.
Harumframt fingu 20 onnur fólk smærri skaðar, sum tey fingu í sambandi við evakueringina av handilshúsinum. Men tey vórðu ikki rakt av skotum.
Københavns Politi tekur fyrivarnir fyri, at fleiri kunnu fara at venda sær til løgregluna um, at tey hava fingið skaða.
Løgreglan vil framvegis fegin frætta frá vitnum, sum kunnu hava sæð okkurt um tað mundið, skottilburðurin fór fram klokkan 17.35 í gjár danska tíð.
Løgreglan metir, at tann 22 ára gamli hevur framt illgerðina einsamallur, og at tað ikki er talan um eina yvirgangsatsókn.
Fyribils hevur handilshúsið Field's boðað frá, at tey hava stongt til 11. juli, men á heimasíðuni hjá Field's sæst, at tey fylgja avísingum frá løgregluni.
/ritzau/