Skjóti B36 spælarin Hannes Agnarsson er ikki longur í barndómsfelagnum. Hann er fluttur til Danmarkar í útbúgvingarørindum, og nú hevur hann funnið nýtt felag.
Heimasíðan hjá HIK veit at siga, at Hannes Agnarsson hevur skrivað undir eitt ára sáttmála við Hellerup Idræts Klub, sum vanliga verður nevnt HIK. Felagið er á áttanda plássi í triðbestu donsku deildini. Tað, sum felagið man vera mest kent fyri, er, at tað fyri umleið 60 árum síðani átti vandamiklasta danska álopsspælaran. Tað var Ole Madsen, sum verður roknaður at vera ein av bestu donsku álopsspælarunum yvirhøvur.
Heimasíðan hjá HIK skrivar, at felagið hevur skrivað eitt ára sáttmála við føroyska landsliðsspælaran, 23 ára gamla og framrættaða Hannes Agnarsson. Hann var sáttmálabundin við B36 inntil á nýggjárinum, og síðani tá hevur hann ikki verið bundin av sáttmála.
Hannes var fyrstu ferð á liðnum hjá HIK leygardagin, tá ið tað endaði við 2-1 sigri á útivølli ímóti Aarhus Fremad, og teir í HIK bera føroyska spælaranum alt gott:
-Hann er skjótur við og uttan bólt og er málrættaður spælari. Hann verður heilt víst vinningur fyri okkum, sigur venjarin Stefan Håkansson.
Hannes Agnarsson, sum higartil bara hevur umboðað B36, hevur spælt 84 landskappingardystir í bestu deildini og skorað 12 mál. Í kappingini um løgmanssteypið hevur hann spælt 13 dystir og skorað tvey mál, og í Europa hevur hann spælt 11 dystir og skorað tvey mál.
Í fjør varð Hannes fyri fyrstu ferð skiftur inn á landsliðið, tá ið Eysturríki var í Føroyum og vann 2-0. Hann hevur spælt fýra dystir á U-21 landsliðnum.
