HB flytur ikki niður

Í kvøld varð farið undir 24. og fjórði síðsta umfar í næstbestu deildini. HB hevði vitjan av NSÍ, og teir gulu fóru undir aftur Tangafjørð við 6-2 tapi. Teir næstbestu hjá HB vunnu stórsigur, og nú man tað vera toluliga vist, at HB, sum stóran part av árinum var í niðurflytingarvanda, ikki fer at flyta niður. HB hevur 32 stig, og tað eru átta stig og frægari málmunur aftur til niðurflytingarpláss.

Lukas Giessing skoraði fyrsta málið í ár, tá ið HB fyri einari viku síðani vann 4-3 á Skála. Í kvøld var Lukas Giessing eyðsýndur. Tá ið 27 minuttir vóru farnir, var HB frammanfyri 4-0. Lukas Giessing legði upp til tvey tey fyrstu málini, sum Mikkel Richardt Mortensen og Gilli Róason skoraðu, og so skoraði Lukas eftir lítlari løtu tvey mál.

Eftir steðgin økti innskifti Áki D. Samuelsen um munin til 5-0, og so økti Rani W. Sørensen um munin til 6-0. Leivur F. Guttesen, sum í fyrra hálvleiki legði upp til eitt mál, legði eisini upp til 6-0 málið.

Síðsta stóra korterið skoraði NSÍ tvær ferðir. Málskjúttar vóru Jørgen Nielsen og Hans Marius Davidsen.

At NSÍ tapti so stórt var merkisvert. NSÍ hevur 37 stig og er á triðja plássi, og HB er á sætta plássi við 32 stigum. Leygardagin vann NSÍ 2-1 á útivølli ímóti AB, sum er næstfremst við 38 stigum. At NSÍ einki stig vann á Tórsvølli í kvøld er søtur musikkur á Argjum, tí tað ber við sær, at møguleikin minkaði fyri, at AB verður trýst burtur av heiðursmerkjaplássi og harvið burtur frá beinleiðis uppflyting.

Í dag

HB – NSÍ 6-2 (4-0)

1-0: Gilli Róason 11.

2-0: sjálvmál 19.

3-0: Lukas G. Giessing 22.

4-0: Lukas G. Giessing 28.

5-0: Áki D. Samuelsen 53.

6-0: Rani W. Sørensen 69.

6-1: Jørgen Nielsen 73.

6-2: Hans Marius Davidsen 88.

Í morgin

EB/Streymur – AB: Rúni Olsen kl. 14.00

Víkingur – Skála: Bjarki Danielsen kl. 13.00

B71 – KÍ: Áki Leitisstein Hansen kl. 14.00

FC Suðuroy – B36: Petur Reinert kl. 13.00