Russland hevur í nátt lopið á fleiri býarpartar í Kharkiv, sum er næst størsti býur í Ukraina og sum liggur lutfalsliga nær markinum til Russlands.
Útlendskar tíðindastovur vita í morgun at siga, at lopið er á við bæði dronum, rakettum og sonevndum tyssubumbum.
Fleiri bústaðarblokkar í býnum standa í ljósum loga.
Sambært borgarstjóranum í Kharkiv, Ihor Terekhov, vóru fyrstu spreingingarnar at hoyra í býnum umleið klokkan 02, lokala tíð og klokkan 04 vóru framvegis álopsdronur í loftrúminum yvir Kharkiv.
Borgarstjórin veit at siga, at í minsta lagi fimm fólk eru dripin og fleiri eru løstað, harímillum eitt tvey ára gamalt barn.
##med2##
Stúrt verður eisini fyri, at fólk liggja undir húsaleivdunum. Ihor Terekhov sigur, at býurin varð raktur av í minsta lagi 50 russiskum rakettum og bumbum.
Fyrr í vikuni lovaði russiski forsetin, Vladimir Putin, hevnd fyri ukrainska álopið á fleiri hernaðarflogvallir í Russlandi herfyri.
- Næst síðstu nátt lótu seks fólk lív og fleiri enn 80 fingu løstir, tá Russland leyp á ukrainska høvuðsstaðin, Kyiv, við dronum og rakettum, veit NRK at siga.
##med3##
