Ein stórur partur av ukrainska høvuðsstaðnum, Kyiv, liggur í streymloys eftir russisk álop á streymveitingina í stórbýnum.
- Støðan í Kyiv er trupul, og í løtuni liggja umleið helmingurin av íbúgvunum uttan streym.
Hetta skrivar ukrainska orkumálaráðið á boðtænastuni, Telegram í kvøld.
Streymslitið kemur eftir eina røð av russiskum álopum á orkuskipanina í Ukraina.
- Í fleiri regiónum verður streymnýtslan skamtað, og roynt verður at hava streym til neyðugu samfelagstænasturnar.
Hetta upplýsir almenni ukrainski streymorkuveitarin, og tað er norska kringvarpið - NRK - sum endurgevur hesar útsagnir.
