Í morgin fara landsstýrismenninir Bjarni Kárason Petersen úr Framsókn, Jóhan Christiansen úr Tjóðveldi og Djóni Nolsøe Joensen, úr Javnaðarflokkinum, úr landsstýrinum, sum samstundis tódnar niður í seks fólk. Somuleiðis verða trý aðalráð niðurløgd. Hetta eru fyrstu stigini í sparingum innan tað almenna, sum løgmaður hevur tikið stig til, eftir at hann fekk fyrsta tilmælið frá nýskipanarnevndini, sum hann hevur sett at gera broytingar í landsfyrisitingini.
Seinast eitt landsstýri varð skipað við seks fólkum var í 1993, tá Marita Petersen var løgmaður og skipaði landsstýri saman við Tjóðveldisflokkinum og Sjálvstýrisflokkinum.
Eitt skifti í 2011 vóru eisini seks fólk í landsstýrinum, tá Fólkaflokkurin tók seg úr landsstýrtinum hjá Kaj Leo Holm Johannesen, løgmanni. Níggju fólk vóru í tí landsstýrinum, tá tað varð skipað í 2008.
Í tilmælinum stendur:
- Nevndin mælir til at fara úr níggju aðalráðum niður í seks aðalráð.
- Nevndin mælir til at broyta stýrisskipanarlógina, soleiðis at tað í mesta lagi kunnu vera seks aðalráð og at landsstýrisfólkatalið eigur at verða í mesta lagi 5 landsstýrisfólk umframt løgmann.
Nýskipanarnevndin vísir á, at miðað eigur at verða ímóti størri eindum, bæði fyri at fáa meiri effektivitet og eitt sterkari fakligt umhvørvi. Ov nógv aðalráð gera tvørgangandi arbeiði og samskipan truplari.
Tað hevði skapt meira stabilitet, um talið av aðalráðum bleiv fastlæst til seks aðalráð við politiskari semju.
Tað er breið politisk semja um at fylgja tilmælinum frá nýskipanarnevndini um at tað eiga at vera seks landsstýrisfólk og aðalráð í Føroyum.
Løgmaður hevur sagt, at hann fer at fylgja tilmælinum við smærri tillagingum í málsøkjabýtinum, og nýggi bygnaðurin kemur í gildi í morgin, 1. desember 2025.
Trý aðalráð fella burtur í nýggja bygnaðinum, eins og at málsøkini vera býtt øðrvísi.
Nýskipanarnevndin mælir til, at nýggi bygnaðurin í landsfyrisitingini sær soleiðis út umframt Løgmansskrivstovuna:
- Fíggjarmálaráðið
- Vinnumálaráðið
- Útbúgvingar- og Mentamálaráðið
- Almanna- og Heilsumálaráðið
- Uttanríkis- og Umhvørvismálaráðið
Løgmaður tekur undir við tilmælinum, men við smærri broytingum í málsøkjabýtinum.
Aðalráðini koma tí frá í morgin at vera hesi umframt Løgmansskrivstovuna:
- Fíggjarmálaráðið
- Vinnumálaráðið
- Barna- og Útbúgvingarmálaráðið
- Almanna- og Heilsumálaráðið
- Uttanríkis- og Umhvørvismálaráðið
Eftir broytingarnar í morgin verður málsøkjabýtið soleiðis:
- Sirið Stenberg, landsstýriskvinna í uttanríkis- og umhvørvismálum og varaløgkvinna
- Ruth Vang, landsstýriskvinna í fíggjarmálum
- Margit Stórá, landsstýriskvinna í almanna- og heilsumálum
- Súsanna Bertholdsen, landsstýriskvinna í barna- og útbúgvingarmálum
- Eirikur í Jákupsstovu, landsstýrismaður í vinnumálum
Tveir av landsstýrismonnunum, sum fara frá í morgin, eru valdir tingmenn. Tað eru Bjarni Kárason Petersen og Djóni Nolsøe Joensen. Teir eru frá í morgin at rokna aftur tingemenn. Tá landsstýrisfólk, sum eru vald á ting, fara frá sum landsstýrisfólk, taka tey automatiskt við aftur sum tingfólk. Tað merkir so aftur, at Árni M. Dam, varamaður á tingi fyri Framsókn, og Kim Duhuus, varamaður á tingi fyri Javnaðarflokkin, missa sínar tingsessir í morgin.
Jóhan Christiansen er ikki valdur á ting. Hann gjørdist nummar 17 á listanum hjá Tjóðveldi til seinasta løgtingsval, so politiska yrkisleiðin hjá honum steðgar – í øllum førum fyribils – í morgin.
