Konsertin verður klokkan 16:30 og hann spælir egnan spildurnýggjan tónleik, sum kemur út á fløguni, Frostfelt síðst í oktober.
Frostfelt kallast soloprojektið hjá Líggjasi Olsen, sum er best kendur úr bólkinum Deja Vu, ið var virkin árini 2000-2007. Deja Vu gjørdust eitt nú vinnarar av GBOB (Global Battle Of The Bands) í 2006, og góvu fløguna A Place To Stand On út í 2005. Líggjas var sangari í bólkinum Diatribes árini 1999-2001. Hann hevur eisini verið við á tveimum fløgum hjá Guðrið Hansdóttir.
Frostfelt er eitt soloprojekt, og á hesi fyrstu EP'ini frá tangentleikaranum og sangaranum samstarvar hann við Sakaris Joensen, eisini kendur sum bert SAKARIS.
Sakaris hevur framleitt »I Have A Tv Set«, sum er heitislagið, og úrslitið er eitt elektroniskt ljóð, har synthljóð og elektronisk beats stuðla uppundir melankolsku, tó popputu og fangandi melodiirnar. Akkustiskt klaver, eitt sindur av rhodes, røddir og so ein rúgva av synthum og elektroniskum programmeringum sigst gera Frostfelt til eitt nokso serligt og hugtakandi útspæl.
