Mikudagin klokkan 11 fekk landsstýrið niðurstøðuna frá grein 6 nevndini, sum landsstýrið og danska stjórnin gjørdu virkna at gera av, um limaskapur Føroya í egnum navni í WTO er sambæriligur við stjórnarskipanarligu støðu Føroya. Og svarið er, at slíkur limaskapur er sambæriligur við stjórnarskipanarligu støðu Føroya.
– Eg fegnist um, at §6 nevndin er samd við løgfrøðiligu niðurstøðuni hjá landsstýrinum um, at limaskapur Føroya í egnum navni í WTO er sambæriligur við stjórnarskipanarligu støðu Føroya. Samstundis harmist eg um, at málið hevur drigið so nógv út vegna eina skeiva tulking hjá danska løgmálaráðnum.
– Eg vóni, at hetta mál fer at føra til ávíst afturhaldni frá danskari síðu at gera avgjørdar einsíðugar niðurstøður um, hvat stjórnarskipanarliga støða Føroya loyvir ella ikki loyvir, sigur løgmaður.
Løgmaður sigur eisini í samrøðu við Sosialin, at tað var júst hesum, tey fóru eftir.
– Málið hevur koyrt í meira enn 10 ár. Eg minnist, at eg á allar fyrsta fundinum við Lars Løkke Rasmussen, forsætisráðharra, tá eg gjørdist løgmaður í 2015, júst var um WTO málið.
– Og hetta málið hevur verið uppi á næstan hvørjum fundi, eg síðani hava havt við danska stjórnarleiðaran – og eg vænti, at tað sama hevur verið, tá Bárður á Steig Nielsen hevur verið á slíkum fundum, sigur hann.
Men svarið frá danskari síðu hevur alla tíðina verið hitt sama.
– Politiskt hevur man stuðlað okkum, men løgmálaráðið hevur alla tíðina hildið uppá, at tað ikki er sambæriligt við donsku grundlógina, og at tað tí ikki ber til.
– Nú kunnu vit so staðfesta, at at hægstirættur hevur givið okkum í landsstýrinum viðhald, at tað er sambæriligt við donsku grundlógina.
Løgmaður vísir tó á, at talan er um ein avmarkandi niðurstøðu, sum tey eisini høvdu roknað við.
– Tað verður sagt, at treytirnar fyri at vera limir í einum altjóða felagsskapi er fyri tað fyrsta, at altjóða felagsskapurin loyvir ikki-statum at vera limir, og tað ger WTO, men øgiliga fáir aðrir felagsskapir.
Fyri tað næsta, at okkara gerðir í felagsskapinum ikki binda kongsríkið, og sum nummar trý, so skulu Føroyar í hvørjum einstøkum føri hava loyvi frá donsku stjórnini at søkja um limaskap.
– Hetta snýr seg bara um WTO, men er eisini ein generel niðurstøða, sigur løgmaður, sum tó ikki heldur, at tað er ein trupulleiki, tí politiskt stuðlar stjórnin okkum
