Tað eru tríggir føroyingar, ið spæla í triðbestu donsku fótbóltsdeildini, allir við A-landsliðsroyndum.
John Frederiksen var ígjár við frá dystarbyrjan, tá lið hansara Brabrand á útivølli tapti 2-3 fyri Skive. Skive var á odda 3-0 áðrenn tað seinastu løtuna eydnaðist Markus Bay og Rasmus Juul Pedersen at minka um munin fyri Brabrand.
Brabrand er næstaftast í deildini við fimm stigum fyri átta dystir.
Hørður H. Askham slapp ikki á vøllin, tá lið hansara, FC Roskilde á útivølli í dag leikti javnleik 0-0 móti oddaliðnum, Thisted.
Roskilde er fjórðfremst í deildini við 14 stigum fyri átta dystir. Thisted er fremst við 18 stigum.
Andrass Johansen slapp fríggjakvøldið á vøllin í 76. minutti, tá Fremad Amager vann ein týdningarmiklan 2-1 sigur á Vendsyssel FF á leikvøllinum í Sundby. Níggju minuttir aftaná Andrass var komin á vøllin skoraði Christoffer Boateng sigursmálið hjá Fremad. Vendsyssel var á odda 1-0 í steðginum. Mads Hoyer Julo javnaði til 1-1 í 65. minutti.
Fremad er nummar átta í deildini við níggju stigum fyri átta dystir. Fremad hevur trý stig upp til týðandi sætta plássið, har AB hevur 12 stig.
