Talið á húskjum í Føroyum er nú komið upp um 20.000. Fyrsta juli vóru 20.064 húski í landinum, og tað eru 187 fleiri enn við ársbyrjan.
Til samanberingar vaks fólkatalið við 603 fólkum sama tíðarskeið árið fyri.
Tølini hjá Hagstovu Føroya vísa, at húski við bert einum fólki eru tann størsti einstaki húskisbólkurin. Í 5.579 húskjum býr eitt fólk einsamalt. Tað svarar til 28 prosent – ella meira enn fjórða hvørt húski í Føroyum.
Næststørsti bólkurin er húski við tveimum vaksnum og ongum børnum. Tey vóru 5.017 í tali fyrsta juli og eru sostatt ein fjórðingur av øllum føroyskum húskjum.
Samanlagt telja hesir báðir bólkarnir 10.596 húski. Tað merkir, at í meira enn helvtini av øllum húskjum í Føroyum býr annaðhvørt eitt fólk ella tvey vaksin uttan børn.
Eingin børn í tveimum av trimum húskjum
Hagstovan staðfestir eisini, at eingi børn búgva í tveimum triðingum av føroysku húskjunum.
Børnini og barnafamiljurnar eru sostatt savnað í umleið einum triðingi av húskjunum, hóast býtið kann fevna um ymisk sløg av familjum og húsarhaldum.
Tann húskisbólkurin, sum lutfalsliga er vaksin mest seinastu árini, er húski við einum vaksnum. Síðan 1. januar 2014 er hesin bólkurin vaksin 39 prosent.
Hagtølini kunnu benda á, at føroyska bústaðarmynstrið er í broyting. Fleiri búgva einsamøll, og stórur partur av bústaðartørvinum er tí ikki bara knýttur at siðbundnum barnafamiljum, men eisini at einstaklingum og húskjum við tveimum vaksnum.
Í hagtølunum verður eitt húski lýst sum persónar, ið hava sama skrásetta bústað í landsfólkaskránni. Vaksin eru persónar, sum eru 18 ár ella eldri.
Kelda: Hagstova Føroya
