Í dag hava Jørgen Niclasen og hansara fólk sitið til samráðingar í fíggjarmálaráðnum í Keypmannahavn, har uppgávan, sum Jørgen Niclasen hevur fingið frá Kaj Leo Johannesen er, at hann skal fáa 150 til 200 milliónir meira í blokkstuðuli, sum er tað, sum blokkurin hevði vaksið, um hann var prístalsviðgjørdur øll árini síðani skerjingina í 2002.
Men tað var púra greitt eftir orðaskiftið í Fólkatinginum, tá fíggjarlógin danska var til fyrstu viðgerð, at tað er lítil og helst eingin møguleiki fyri, at Fólkatingið fer at taka undir við eini slíkari umbøn. Hinvegin søgdu øll framsøgufólkini, at tey væl kundu taka undir við, at blokkstuðulin verður prístalsviðgjørdur frameftir.
Tað merkir, at blokkstuðulin ikki veksur við 200 milliónum krónum, men við áleið átta milliónum krónum. Soleiðis verður úrslitið ímillum 142 og 192 milliónir frá tí, sum løgmaður hevur sagt.
So er spurningurin, um samgongan meinar hetta í álvara, ella um talan er um eina hálvhjartaða roynd. Tað er Edmund Joensen, fólkatingsmaður, sum hevur tosað mest um at fáa fatur á hesum pengum, sum vit hava »mist« seinastu 10 árini. Løgmaður tók umsíðir undir við tí, og Sambandsflokkurin brúkti tað í valstríðinum.
Tað undrar eisini, at allir hini tríggir samgonguflokkarnir hava kúvent í hesum máli, og tað fær okkum eisini at misteinkja teir fyri lótir. Serliga Fólkaflokkin.
Rodmundur Nielsen, sum var framsøgumaður hjá Fólkaflokkinum, tá málið var fyri í tinginum segði, at hetta smakkaði flokkinum illa. Við øðrum orðum, so hevur flokkurin hjá Jørgen Niclasen tosað ímóti ætlanini í løgtinginum, og tí veit Bjarne Corydon sjálvandi av. Tí er lagað manni hjá honum at siga nei, til at prístalsviðgera við afturvirkandi kraft.
Úrslitið verður tískil uttan iva, at Jørgen Niclasen í kvøld kann kom heim av Flatlondum við einum blokkstuðuli, sum verður einar átta milliónir hægri. Á tann hátt kemur hann heim við einum úrsliti, sum ikki hóvar løgmanni, men sum fellir í góða jørð hjá Fólkaflokkinum og fólkafloksveljarum.
Tá hevur Fólkaflokkurin aftur vunnið ein sigur í samgonguni. Vildi løgmaður stýrt, so kundi hann sjálvur farið til Danmarkar fyri at fingið hasar 200 milliónirnar.
