Í kvøld tóku Pauli Mittún og liðfelagarnir í Team Sydhavsøerne móti Rækker Mølle í dysti í næstbestu donsku hondbóltsdeildini í Lollands Bank Arena.
Tað eydnaðist suðuroyggjamonnum at vinna dystin 27-24. Í steðginum var heimaliðið á odda 15-11.
Pauli skoraði fýra mál í kvøld.
Team Sydhavsøerne er nú nummar fýra við 25 stigum. Teir eru bert eitt stig aftanfyri eitt annað føroyingalið, HØJ sum hevur 26 stig á triðja plássinum. Aftaná lokið grundspæl sleppur nummar trý at spæla Play Off dystir um uppflyting, so Team Sydhavsøerne hevur veruliga meldað seg inn í uppflytingarstríðið nú.
Komandi fríggjakvøld verður føroyingauppgerð á Frederiksberg í Keypmannahavn. Tá taka Jónas G. Djurhuus, Leivur Mortensen, Janus Dam Djurhuus og liðfelagarnir í FIF móti suðuroyggjamonnum á heimavølli.