Fert tú á ólavsøku í ár?
- Ja, eg fari á ólavsøku. Tað eri eg altíð. Eg kann telja á einari hond, hvussu sjáldan eg ikki havi verið á ólavsøku, sigur Astrið Breckmann.
Hvat heldur tú er tað besta við tjóðarhátíðini?
- Tjóðskaparkenslan av at vera føroyingur. Eg elski Føroyar!
Nú hon sum løgtingslimur fer at ganga skrúðgongu á ólavsøku í ár, verður hetta helst ein ógloymandi uppliving.
- Hetta er ikki veruliga gingið upp fyri mær enn, og eg eri so takksom fyri øll, ið valdu meg.
Astrið Breckmann nevnir fleiri ting, sum eru góð við ólavsøkuni:
* Øll setanin sum hon er
* Allur hugnin við familju og vinum
* Tann góði maturin
Hon nevnir eisini útimøtið, sum Samkoman Gleðiboð hevur havt ólavsøkuaftan klokkan 19 í Vágsbotni seinastu árini.
Er okkurt, tú saknar við ólavsøkuni?
- Eg haldi, at ólavsøkan verður bara betri við árunum, men um eg skal nevna nakað, eg veruliga sakni, so er tað øll í familjuni, sum eru farin foldum frá, og sum vit altíð vitjaðu á ólavsøku. Tað sakni eg veruliga, sigur hon.
Minnist tú onkra ólavsøku fram um aðrar?
- Ein ólavsøka nøkur fá ár herfyri var tann vátasta, eg minnist. Men, vit lótu okkum bara øll í regnklæði og tóku regnskjólini við, og so fóru vit bara út við øllum børnunum – øll familjan.
At enda sigur Astrið Breckmann soleiðis:
- Hóast tað oysti niður, so høvdu vit í Gleðiboð útimøti kortini. Har var fult av krokandi fólki, sum sungu við. Tað var fantastiskt og liggur á youtube.
