Amerikanski serligi sendiharrin í Grønlandi, Jeff Landry, lendi í dag á flogvøllinum í Nuuk. Tað veit grønlendski miðilin Sermitsiaq at siga frá.
Væntandi fer hann á vinnumessu í næstu viku saman við amerikanska sendiharranum í Danmark, Ken Howery.
Sermitsiaq skrivar, at Jeff Landry og hini fólkini í flogfarinum vórðu heintað á flogbreytini í bilum og fóru av flogvøllinum.
Á vitjanini letur Ken Howery eisini upp nýggju bygningarnar hjá amerikanska konsulátinum í Nuuk. Tað skrivaði amerikanska sendistovan í Danmark í tíðindaskrivi mikudagin.
Ongar almennar fráboðanir hava verið um, at Jeff Landry áður hevur vitjað í Grønlandi, meðan hann hevur verið serligur sendiharri.
Hann varð settur í nýstovnaða starvið sum serligur sendiharri í Grønlandi í desember í fjør.
Hetta hendi, eftir at Trump fleiri ferðir hevði luftað tankar um, at USA hevði brúk fyri Grønlandi av trygdarávum.
– Tað er ein heiður at tæna tykkum í hesum sjálvbodna leiklutinum at gera Grønland til ein part av USA, skrivaði Jeff Landry á X, tá hann varð settur.
Nakrar dagar seinni legði hann tó dent á í samrøðu við Fox News, at USA ikki fór at "yvirtaka landið hjá nøkrum".
Umframt at vera serligur sendiharri, er republikanski Jeff Landry eisini guvernørur í amerikanska statinum Louisiana.
Á vitjanini í Grønlandi fara sendimaðurin og serligi sendiharrin at hitta fleiri grønlendingar fyri at lurta og læra, upplýsir sendistovan.
Tey hava sum mál at víðka um búskaparligu møguleikarnar, skapa bond og økja um skil millum amerikanarar og grønlendingar, stendur í fráboðanini.
Bæði DR og TV 2 hava eisini sunnukvøldið almannakunngjørt myndir frá grønlendska flogvøllinum, har sæst, at eitt flogfar við amerikanskum flaggi og tekstinum "United States of America" er lent.
Í mars fekk Jeff Landry boð um at luttaka á landskappingini í hundasletu í Grønlandi av einum ferðavinnufelag.
Men tað fall ikki góða jørð hjá fyrireikurnum, og felagið endaði við at taka boðini aftur.
/Ritzau/
