Skála vann næstbestu deildina, og harvið skal Skála í 2022 aftur spæla í bestu deildini, sum felagið í fjør flutti niður úr.
Venjari hjá Skála síðani á sumri í 2020 hevur verið Sorin Anghel. Sorin og Skála skrivaðu í fjør undir tvey ára sáttmála, men nú er tað greitt, at nýggjur maður verður við róðrið, tá ið Skála Ítróttarfelag í 2022 – eftir at hava verið burturi í eitt ár – aftur fer at royna seg í bestu deildini.
Skála Ítróttarfelag skrivar soleiðis í dag:
Skála ÍF og Sorin Anghel eru komin ásamt um at steðga samstarvinum. Spælararnir blivu kunnaðir um støðuna í gjár.
Sorin kom til felagið á sumri 2020, eftir eina tung gongd í betri deildini fyrru hálvu. Saman við Sorin kom Eugen Voda inn í venjaratoymið sum málmansvenjari. Saman við restini av venjaratoyminum megnaði Sorin at lyfta leikararnar og skapa spæligleði, hóast tað vísti seg at vera ógjørligt at venda gongdini móti niðurflyting. Okkurt gott úrslit kom í hús, og fleiri ferðir var tað um reppið, at vit fingu úrtøku úr dystum. Móti endanum var tað nær við, men tá saman um kom, vóru vit ov stuttir til at yvirliva í deildini.
Í 2021 var greiði málsetningurin at vinna 1. deild og tryggja uppflyting aftur. Góð úrslit í fyrru hálvu løgdu longu áðrenn summarsteðgin lunnar undir, at hetta skuldi eydnast. Men í seinnu hálvu gjørdist úrtøkan heldur misjøvn, tó at fyrsta plássið ongantíð veruliga var í vanda.
Felagið ynskir at takka Sorin fyri hansara íkast til felagið, og takka fyri gott samstarv hesa tíðina.
Eugen hevur eisini boðað frá, at hann ynskir ikki at halda fram sum hjálparvenjari komandi ár, og vit fara at ynskja bæði Sorin og Eugen alt tað besta framyvir.
Felagið arbeiðir við øðrum loysnum viðvíkjandi venjarapostinum til komandi ár, og vóna vit at hetta er komið uppá pláss skjótt, skrivar Skála Ítróttarfelag.
