Eitt spanskt F-18-stríðsflogfar hevur í nátt skotið eina dronu niður, sum var komin inn í rumenskt loftrúm.
Tað upplýsir rumenska verjumálaráðið í dag.
Spanska flogfarið var partur av einari NATO-uppgávu, sum hevur til endamáls at hava eftirlit við og verja loftrúmið hjá Rumenia.
Sambært verjumálaráðnum vístu radarar, at dronan kom inn í Rumenia úr grannalandinum Moldova umleið 24 kilometrar norðan fyri býin Galati í landsynningspartinum av landinum.
Dronan varð skotin niður klokkan 05.01 lokala tíð. Leivdirnar eftir henni eru eftir øllum at døma dotnar niður í einum óbygdum øki millum tvær bygdir.
Enn er ikki upplýst, hvør sendi dronuna.
Hetta er fjórðu ferð í ár, at eitt ómannað flogfar verður skotið niður yvir Rumenia.
Í juli vórðu tríggjar russiskar dronur skotnar niður, eftir at tær høvdu brotið rumenskt loftrúm. Tað var fyrstu ferð síðan russisku innrásina í Ukraina í februar 2022, at Rumenia skeyt russiskar dronur niður.
Rumenia er limur í bæði NATO og ES og hevur meira enn 600 kilometrar av felags landamarki við Ukraina.
Í mai datt ein russisk drona niður í ein íbúðarbygning í Galati. Tvey fólk vórðu særd.
Hendingin fekk tá NATO-aðalskrivaran, Mark Rutte, at undirstrika, at samgongan er til reiðar at verja alt økið hjá NATO-limalondunum.
/Ritzau/Reuters
