Landsstýriskvinnan segði fyrr í ár, at fyrireikingarnar væntandi skuldu vera lidnar undan summarfrítíðini.
Elsebeth Mercedis Gunnleygsdóttur, løgtingskvinna, hevur sett Eyðdis Hartmann Niclasen, landsstýriskvinnu í heilsumálum, ein skrivligan fyrispurning um skanning av bróstkrabba á Klaksvíkar Sjúkrahúsi.
Hon spyr, um Sjúkrahúsverkið nú er liðugt við útgreiningararbeiðið og fyrireikingarnar, sum skulu til fyri at seta MR-skanningar av bróstum í verk á Klaksvíkar Sjúkrahúsi.
Hon vil eisini hava at vita, um bróstskanningar longu verða gjørdar í 3 Tesla-skannaranum á sjúkrahúsinum. Um so ikki er, spyr hon, nær væntast kann, at fyrstu MR-skanningarnar av bróstum kunnu setast í verk.
Elsebeth Mercedis Gunnleygsdóttur vísir á, at landsstýriskvinnan í svari upp á ein fyrispurning fyrr í ár segði, at útgreiningararbeiðið og fyrireikingarnar væntandi skuldu verða klár undan summarfrítíðini í ár.
– Nú summarferian er farin aftur um bak, loyvi eg mær at seta henda fyrispurning, fyri at vita, hvør støðan er í hesum máli, skrivar Elsebeth Mercedis Gunnleygsdóttur í viðmerkingunum til fyrispurningin.
Fyrispurningurin varð settur í dag, 14. august.
