Enn er stríðið ikki av. Tvørtur ímóti er tað bara byrjað. Tað sigur Súni Selfoss, formaður í Starvsfelagnum eftir semjuna leygarkvøldið ímillum pedagogarnar og arbeiðsgevararnar. Løgtingið hevði annars eitt uppskot til viðgerar um at fáa fleiri pedagogar til arbeiðis á stovnum undir Almannaverkinum, og tað fekk fakfeløgini at hótta við tiltøkum. Uppskotið varð kortini tikið aftur, tá ið semjan varð skrivað undir.
Men enn er hundurin ikki meiri enn hálvbardur, tí Helgi Abrahamsen, landsstýrismaður í almannamálum, hevur boðað frá, at hann vil hava eina varandi skipan, so at tey veikastu í samfelagnum ikki verða so hart raktir, tá ið verkfall er. Hann vónar at tað kann gerast í samstarvi við fakfeløgini, men eydnast tað ikki, er hann sinnaður at tvinga tað ígjøgnum við lóg.
Súni Selfoss sigur, at nú fer arbeiðsbólkurin, fakfeløgini settu í sambandi við pedagogverkfallið, at taka saman um hetta verkfallið Men tað er eisini greitt, at tey fara at viðgera ætlanina hjá Helga Abrahamsen um at finna eina fasta skipan fyri, hvussu undantøk skulu gevast í eini verkfalli. Hann sigur, at endamálið er, at øll fakfeløgini verða kallað saman at viðgera støðuna.
Formaðurin í Starvfelagnum sigur, at hetta er eitt mál sum tey taka í líka stórum álvara sum tey tóku tað, táið Løgtingið legði upp í verkfallið hjá pedagogunum. Og hann sigur, at endamálið er, at fakfeløgini aftur koma við eini felags fráðboðan í sambandi við ætlanina hjá Helga Abrahamsen.
– Ætlanin at leggja upp í pedagogverkfallið, var bara byrjanin, men tað er langt frá liðugt, sigur Súni Selfoss. Annars vil hann einki siga um longu nú um ætlanina hjá Helga Abrahamsen, men hann sigur, at talan er um eitt mál, feløgini taka í størsta álvara. So er spurningurin, hvat landsstýrismaðurin ætlar, og so taka vit tað haðani frá, sigur hann
Ein slík skipan er gjørd fyri Strandferðsluna, at trygd er fyri, at Smyril siglur minst ein túr um dagin, hóast verkfall er og samstundis verður eisini siglt upp á útoyggjarnar. Afturfyri fær manningin so eitt lønarískoyti.
Men Súni Selfoss vil ikki siga longu nú um tað er ein máti, fakfeløgini kunnu góðtaka á fleiri økjum. Verkfalsrætturin er ikki til sølu, men so fáa vit at síggja, hvat landsstýrismaðurin kemur við, sigur hann.
