– Eg ætli mær so avgjørt aftur í Løgtingið, men tað verður ikki reiðiliga enn, tí eg skal til eina intensiva uppafturvenjing í Danmark í næstum.
– Men so skjótt eg eri klárur, so fari aftur í Løgtingið.
Tað sigur Kaj Leo Holm Johannesen í samrøðu við Sosialin hesaferð, tá blaðið hittir hann til eitt prát, nú hann hevur verið burturi frá politikki í meira enn eitt ár.
Kaj Leo Holm Johannesen hevur sitið á tingi síðani 2002. Hann gjørdist formaður í Sambandsflokkinum í 2004, og hann gjørdist Føroya Løgmaður í 2008. Hann var løgmaður í tveimum samgongum til hann fór frá í 2015. Í 2019 gjørdist hann landsstýrismaður í heilsumálum. Síðani løgtingsvalið í 2022 hevur Kaj Leo Holm Johannesen verið tingmaður. Seinasta árið hevur hann tó verið sjúkrameldaður.
Gjørdist sjúkur og mist førleikan
Seinastu tíðina hevur Kaj Leo Holm Johannesen verið merktur av sjúku. Hann hevur diagnosuna CIDP, sum ger, at hann hevur skerdan førleika og situr í koyristóli.
Hann er spentur upp á intensivu uppafturvenjingina, hann skal til í Glostrup.
– Har verður koyrt á í ein til tveir mánaðir. Neurologurin trýr enn upp á tað, sigur hann.
Spurdur um hann væntar at fara at ganga aftur, sigur hann, at tá er man for optimistiskur.
– Men man lærir at liva í koyristóli. Tað er ein øgiligur munur, um tú bara fært tað 10 prosent betir, sigur hann.
Manglar veruliga nógv hjá rørslutarnaðum
Kaj Leo Holm Johannesen hevur áður sagt, at hann ætlaði sær á ting eftir ólavsøku, men síðani hevur hann tosað um september ella oktober. Men nú hann skal niður til uppafturvenjing væntar hann ikki, at tað verður fyrr enn nakað seinni.
Seinastu tíðna hava vit hoyrt nógv um felagið »Skerdur Førleiki«, sum Kaj Leo Holm Johannesen hevur tikið stig til at stovna.
– Ja tað er ein øgiligur áhugi fyri nýggja felagnum, tí har hevur verið eitt vacuum, sigur hann.
– Eg havi hugsað, at tað mangla veruliga nøkur ting til tey, sum sita í koyristóli og hava skerdan førleika. Og nú eg arbeiði við hesum, síggi eg bara meira og meira, hvussu lítið man í veruleikanum hugsar um hesi fólkini, sigur Kaj Leo Holm Johanesen.
– Tað er hetta við kantum og atkomu til wc úti í tí almenna. Ella tá tú ferðast, hvørjar sengur hava tey í avlamiskamarinum, vísir hann á.
Lesið meira í Sosialinum, sum fæst í leysasølu kring landið, og sum haldarar kunnu lesa á sos.fo við at logga á við haldaranummarinum
