Týskland og onnur vesturlendsk sameind lond hava avtikið fjarstøðuavmarkingarnar fyri nýtslu av langtrøkkandi vápnum hjá Ukraina móti Russlandi.
Tað sigur týski kanslarin, Friedrich Merz, í samrøðu, sum varð almannakunngjørd dag.
- Tað eru ikki longur nakrar fjarstøðuavmarkingar fyri vápnum, sum verða latin til Ukraina - hvørki av bretum, fraklendingum, okkum ella amerikanarum, sigur hann í samrøðu, við týska kringvarpið WDR.
- Hetta merkir, at Ukraina nú kann verja seg - til dømis við at leypa á hernaðarlig støð í Russlandi. Við sera fáum undantøkum kundi Ukraina ikki tað fyrr enn fyri stuttum. Nú kann tað gera tað.
Í svarinum sigur Russland, at ein slíkt stig fer at skerja royndirnar at fáa vápnahvíld.
Merz, sum gjørdist kanslari fyrr í hesum mánaðinum, sigur eisini í samrøðuni, at "vit fara at gera alt í okkara valdi fyri framhaldandi at stuðla Ukraina, eisini hernaðarliga".
Ritzau/AFP
