Valskúlin – ein sólskinssøga um 10. flokkarnar í Norðoyggjum

Fyri stuttum var býráðs­um­sitingin á stuttari kunn­ing­arvitjan í báðum teimum stóru skúlunum í Klaksvíkar kommu, sum eru Skúlin við Ósánna og Skúlin á Ziska­trøð.
Undir leiðslu av skúla­stjór­unum báðum, Símin Petur Hjelm og Signar á Brúnni, samstarva hesir báð­ir skúlar innan fleiri tættir.
Eitt av samstarvsøkjum skúlanna er innan 10. flokk­arnar, sum eru lagdir saman í ein felags skúladepil fyri allar Norðoyggjar, nevndur »Valskúlin«, ið fevnir um íalt 63 næmingar.
Tað var ein ikki sørt errin Signar á Brúnni, skúlastjóri, ið vísti borgarstjóranum og umsiting hansara runt í hugna­ligu hølunum hjá Val­skúlanum, og tað var ikki uttan orsøk, tí Valskúlin er, sum skilst, ein higartil sera væl eydnað skipan fyri allar 10. flokkar í Norðoyggjum.
Tey halda støddina vera júst ta røttu, tí við hesum næmingatalinum hava tey eitt nøktandi grundarlag til at kunna bjóða nógvar ymiskar vallærugreinir, og samstundis er Valskúlin ikki so stórur, at tað gongur út yvir tað hugnaliga og heimliga umhvørvið.
Við tilvísing til skúla­stjóran samskipar, Hanus T. Bærentsen, sum er royndur lærari, undirvísingina í Val­skúlanum, har hann sjálvur er flokslærari hjá einum av flokkunum, samstundis sum hann samstarvar sera tætt við hinar flokslærar­ar­nar, sum eru Simona Jo­­hannesen, Tummas Joensen og Høgni á Reynatrøð.
Samstarvið millum hesar 10. flokkarnar er rættiliga tætt. Eitt nú fylgjast teir í sambandi við allar felags lærugreinarnar, soleiðis at lærarar og næmingar støð­ugt kunnu samstarva og stuðla hvørjum øðrum í frálæruni og menningini, eins væl og teir kunnu av­­loysa hvønn annan.
Royndirnar av at hava undirvísing í sergreinum, sum strekkja seg ígjøgnum alt skúlaárið, eru ikki bara góðar, tí tað vísir seg at vera torført at varðveita áhuga næminganna ígjø­gnum alt árið, halda tey.
Men her hevur Valskúlin brotið upp úr nýggjum við heldur at leggja øðrvísi frálæru í tíðarskeiðum, har heilar vikur ístaðin verða lagdar av til serlig tiltøk, so sum fyrstuhjálparskeið, trygdarskeið, høvuðsverk innan ymiskar lærugreinar o.s.fr.
Eitt nú fer Valskúlin í november at geva næm­ingum møguleika at velja seg at arbeiða við einum evni í eina viku. Millum evn­ini eru list, og í tí sam­bandi fær skúlin eini fýra kend listafólk at undirvísa, og fara hesi at samstarva við næmingarnar og leggja teimum lag á. Arbeitt veðrur við horni, seyming o.a., og tá ið ið vikan er liðug, verð­ur alt arbeiðið sýnt fram.
Royndir Valskúlans hava higartil boðað frá góðum. Hesin frálæruháttur tykist rigga sera væl.
Valskúlin leggur stóran dent á, at allir partar verða mettir, viðfarnir og ábyrgd­aðir sum vaksin fólk. Barna­skúlatíðin er farin afturum – nú skulu næm­ingarnir royna seg í einum vaksnum umhvørvi, sum á mangan hátt minnir nógv um ein miðnámsskúla.
Eisini nakrar av læru­grein­unum, sum kunnu velj­ast, og nakrar av høv­uðs­upp­gávunum, sum næm­­ingarnir fáa í hesum skúla­árinum, eru á mið­náms­skúlastøði, og sam­starv við miðnámsskúlar er eisini partur av tilboðum Valskúl­ans.