Forsetin í Ukraina, Valdimir Zelenskij, hevur víst á Mykhailo Fedorov sum nýggjan verjumálaráðharra.
Tað upplýsir tíðindastovan AFP.
Samstundis verður núverandi verjumálaráðharrin, Denys Shmyhal, settur í annað starv í stjórnini.
- Eg havi avgjørt at broyta bygnaðin í ukrainska verjumálaráðnum, segði Zelensky fríggjadagin í dagligari røðu á sosialu miðlunum.
- Eg havi bjóðað Mykhailo Fedorov starvið sum nýggjur ukrainskur verjumálaráðharri.
ára gamli Fedorov kemur úr einum starvi sum fyrsti varaforsætisráðharri og ráðharri í talgildari umlegging.
- Mykhailo er djúpt involveraður í dronuviðkomandi málum og er sera effektivur, tá tað kemur til talgilding av statsligum tænastum og tilgongdum, segði Zelensky.
Óvist er, hvørja støðu Shmyhal nú fer at hava. Hann hevur bert verið verjumálaráðharri síðani juli 2025, og Zelenskyj greiðir ikki frá, hví hann er skiftur út.
Zelenskyj sigur, at Shmyhal nú skal standa á odda fyri einum øki, sum er "ikki minni týdningarmikið fyri okkara stabilitet."
Broytingin er ikki tann einasta, sum varð kunngjørd fríggjadagin.
Fyrr mikudagin setti forsetin Kyrylo Budanov, sum higartil hevur verið leiðari fyri hernaðarligu fregnartænastuna í Ukraina, sum nýggjan stabsleiðara í ukrainsku forsetaumsitingini.
Fyrrverandi starvsfólkaleiðarin Andriy Yermak legði frá sær í november eftir eina stóra korruptiónsgølu.
Samstundis verður núverandi leiðarin á uttanríkisfregnartænastuni, Oleh Ivasjtjenko, nýggjur leiðari á fregnartænastuni her.
Avloysararnir koma í eini tíð við áhaldandi avbjóðingum á vígvøllinum fyri Ukraina.
Ein greining hjá tíðindastovuni AFP vísir, at 2025 er árið síðani 2022, har Russland hevur hertikið mest ukrainskt øki.
Tilsamans hertók russiski herurin meira enn 5.600 ferkilometrar, sum svarar til 0,94 prosent av økinum hjá Ukraina, seinasta árið, vísir ein greining av dátum frá hugskotsstovninum Institut for the Study of War.
Fyrr í dag gav Ukraina boð um at flyta 3.000 børn og foreldur teirra úr tilsamans 44 bygdum við hermótið í Zaporizhia og Dnipropetrovsk-økjunum.
Ritzau/AFP
