Áðrenn jarðarferðina skal hann hitta norska forsætisráðharran at tosa um hernaðarstuðul til Ukraina.
Volodymyr Zelenskyj, forseti í Ukraina, kom í dag til Noregs. Tað upplýsir norska forsætismálaráðið.
Endamálið við ferðini er fyrst og fremst at vera við til jarðarferðina hjá Haraldi kongi, sum verður í morgin.
Haraldur kongur andaðist á Ríkissjúkrahúsinum í Oslo tíðliga um morgunin 28. august eftir at hava verið innlagdur í tvær vikur. Hann gjørdist 89 ára gamal.
Meðan hann var innlagdur, varð hann viðgjørdur fyri blóðsjúkuna hemolytiska anemi og fyri bakteriella blóðeitran.
Haraldur gjørdist kongur í Noregi í 1991. Seinastu árini var heilsan viknað, og hann varð fleiri ferðir innlagdur. Í 2024 fekk hann millum annað ein pacemakara eftir eina infektión, sum hann fekk á eini frítíðarferð í Malaysia.
Stutt eftir deyða kongsins sendi Zelenskyj samkensluheilsan vegna ukrainska fólkið.
– Hansara hátign var ímyndin av virðing, vísdómi og einum óvikandi trúskapi móti landi sínum, skrivaði Zelenskyj á X.
Hann legði afturat, at Ukraina altíð fer at minnast stuðulin og samhaldsfestið hjá Haraldi kongi við ukrainska fólkið undir russiska álopskrígnum.
Fleiri hundrað fólk verða væntandi við til almennu jarðarferðina mikudagin. Umframt familju og nærmastu vinir kongsins koma fleiri ríkisleiðarar og kongalig úr øðrum londum.
Úr Danmark koma millum onnur Fríðrikur kongur, Mary drotning, Christian krúnprinsur og Benedikte prinsessa.
Áðrenn jarðarferðina hevur Zelenskyj eisini politiskar fundir í Noregi. Týsdagkvøldið skal hann hitta norska forsætisráðharran, Jonas Gahr Støre.
Teir skulu millum annað umrøða norskan hernaðarstuðul til Ukraina.
– Ukraina hevur alstóran tørv á loftverju og øðrum hernaðarstuðli, og landið stendur framman fyri einum krevjandi vetri, sigur Jonas Gahr Støre.
Hann sigur, at teir millum annað fara at umrøða, hvussu norskur hernaðarligur og sivilur stuðul best kann svara tørvinum hjá Ukraina beint nú.
##med2##
/Ritzau/
