Russiski forsetin, Vladimir Putin, er komin til New Dehli í India at luttaka á sonevnda BRICS-toppfundinum.

Tað vita russiskar tíðindastovur at siga tíðliga í morgun.

BRICS er eitt samstarv, har ríkisleiðarar í Russlandi, Brasilia, India, Kina og Suðurafrika eru við.

Seinnu árini eru eisini fleiri onnur lond, sum eitt nú Egyptaland og Samendu Arabisku Emiratini, vorðin partur av felagsskapinum.

Onnur lond, sum plaga at luttaka á BRICS, eru Hvítarussland, Bolivia, Kasakstan, Kuba, Malaysia, Nigeria, Thailand, Uganda, Usbekistan og Vietnam.

Væntandi er, at BRICS-toppfundurin hesaferð serliga fer at snúgva seg um kríggini í Miðeystri og Ukraina.

Russiskir miðlar vita at siga, at Vladimir Putin verður í India í tríggjar dagar, og sagt verður, at hann varð ynsktur vælkomin av virkandi indiska uttanríkisráðharranum, Kirti Vardhan Singh.

Kinesiski forsetin, Xi Jinping og iranski forsetin, Masoud Pezeshkian, eisini eru við á BRICS-toppfundinum í India hetta vikuskiftið.