Útlitini fyri grønlendska búskapin eru batnað.

Eftir trý ár við einum vøkstri undir einum prosenti væntar Búskaparráðið í Grønlandi, at búskapurin fer at vaksa 1,3 prosent í 2026 og 1,5 prosent í 2027.

Tað sæst í eini frágreiðing, sum varð almannakunngjørd í gjár.

Serliga toskafiskiskapurin er við til at lyfta búskapin. Í 2025 var toskaveiðan 65 prosent størri enn í 2022, og samstundis fæst hægri prísur fyri fiskin.

Hinvegin er veiðan av svartkalva og rækjum minkað. Toskur, svartkalvi og rækjur standa tilsamans fyri 90 prosentum av grønlendska útflutninginum av fiski og skeljadjórum og hava tí avgerandi týdning fyri búskapin.

Sambært Búskaparráðnum hevur trýstið á rækjufiskiskapin verið ein av orsøkunum til lága búskaparvøksturin seinastu trý árini.

Ráðið væntar eisini, at inflatiónin fer at lækka úr 3,7 prosentum í 2025 niður í umleið trý prosent í bæði 2026 og 2027. Harumframt verður roknað við, at arbeiðsloysið minkar.

Færri og eldri íbúgvar leggja trýst á

Hóast ljósari útlit eru framvegis álvarsligar avbjóðingar fyri framman, ávarar Búskaparráðið.

Fólkatalið verður væntandi minni, og íbúgvarnir eldri. Hetta fer at leggja trýst á almennu fíggjarligu viðurskiftini næstu áratíggjuni.

Móti endanum av 2030-árunum verður roknað við einum árligum halli í landskassanum á 400–500 milliónir krónur.

Tí er sambært ráðnum stórur tørvur á nýskipanum, sum kunnu fáa fleiri at arbeiða, økja framleiðsluførið, hækka útbúgvingarstigið ella tálma útreiðsluvøkstrinum.

Búskaparráðið er sett av grønlendska landsstýrinum, Naalakkersuisut, og hevur til uppgávu at greina og meta um grønlendska búskapin. Seks limir eru í ráðnum, og formaður er Torben M. Andersen, professari við Aarhus Universitet.

Ritzau