Nítjan al-Qaeda-yvirgangsmenn rændu fýra ferðafólkaflogfør. Tvey vórðu flogin inn í tvíburatornini í World Trade Center í New York, eitt rakti Pentagon, og tað fjórða datt niður í Pennsylvania, eftir at ferðafólk høvdu roynt at taka valdið aftur.
Tilsamans 2.977 fólk úr meira enn 90 londum lótu lív. 2.753 doyðu í New York, 184 við Pentagon og 40 umborð á flogfarinum, sum datt niður í Pennsylvania.
Álopini broyttu heimin. USA fór í kríggj í Afghanistan, stríðið móti yvirgangi gjørdist ein høvuðstáttur í altjóða politikki, og trygdareftirlitið á flogvøllum kring heimin varð grundleggjandi broytt. AP News
Í dag verða tey deyðu minst í New York. Familjur savnast á staðnum, har tvíburatornini stóðu, og nøvnini á teimum, sum doyðu, verða lisin upp. Seks tøgnarløtur verða hildnar á klokkusløgum, sum merkja, tá flogførini raktu, tornini fullu og hini bæði álopini vóru.
Ein fjórðingsøld er farin. Fyri ein vaksandi part av fólkinum er 11. september ikki longur eitt minni, men søga. Meira enn 100 milliónir amerikanarar eru í dag ov ungir til sjálvir at minnast dagin.
