Bíðað verður í spenningi eftir, nær Bárður á Steig Nielsen fer at skriva út valið. Við Kringvarpið á middegi segði hann, at hann bíðaði eftir onkrum, áðrenn hann kundi taka støðu. Hann nágreinaði ikki, hvørjum hann bíðar eftir.
Men tað kann verða, at hann bíðar eftir onkrum tekniskum í sambandi við valdagin og um fíggjarlógina, sum á onkran hátt skal avgreiðast.
Mest sannlíkt er, at Løgtingið samtykkir eina »provosoriska fíggjarlóg«, ella ein bráðfeingis játtanarlóg, sum tað eitur. Tá er tað galdandi fíggjarlóg, sum heldur fram soleiðis, at stovnar hjá landinum kunnu virka. Men teir kunnu tá ikki hava nakrar eyka útreiðslur, seta nýggj fólk, gera íløgur, ella á annan hátt brúka meira pengar, enn tað sum var játtað á fíggjarlógini frammanundan.
Hetta var seinast gjørt í 2011, tá løgtingsvalið var 29. oktober. Landsstýrið, sum sat frammanundan, hevði lagt fram eitt fíggjarlógaruppskot, sum samgongan segði seg ikki vera føra fyri at viðgera liðugt til nýggjárs. Tí var ein bráðfeingis játtanarlóg samtykt. Tá skrivaði landsstýrismaðurin soleiðis í viðmerkingunum:
»Sambært stýrisskipanarlógini skal fíggjarlógaruppskot vera lagt fyri Løgtingið áðrenn 1.  oktober, og Løgtingið hevur tí vanliga tríggjar mánaðir at viðgera uppskotið, áðrenn dagførda fíggjarlógin skal vera samtykt. 
Í ár varð løgtingsval skrivað út 27. september, og nýggj samgonga varð skipað 14. november. Landsstýrið fór alt fyri eitt í holt við at fyrireika fíggjarlógaruppskotið fyri 2012, sum var lagt fyri Løgtingið 2. desember 2011.
Løgtingið hevur boðað frá, at tey megna ikki at viðgera fíggjarlógaruppskotið liðugt áðrenn 1. januar 2012, og tí hevur landsstýrið sambært stýrisskipanarlógini § 43, stk. 3 skyldu til at leggja fram uppskot um eina bráðfeingis játtanarlóg. Hetta uppskotið skal fáa til vega ta neyðugu heimildina at føra landshúsarhaldið víðari, til løgtingsfíggjarlógin fyri 2012 er samtykt. Íkomna støðan hevur við sær, at inntøkur og útreiðslur sambært galdandi siðvenju skulu haldast á áleið sama støði sum í játtanarlógunum fyri 2011, tó við hóskandi afturhaldni við útreiðsluatgerðum. 
Fyri inntøkujáttanir verða beinleiðis og óbeinleiðis skattir (t.e. avgjøld og lógarkravd gjøld) uppkravd eftir galdandi lógum. Fyri játtanir av játtanarslagnum Rakstrarjáttan heldur vanligt virksemi í neyðugan mun fram. Um neyðugt, ber til at endurseta starvsfólk fyri tey, sum fara úr starvi, men ikki er loyvt at økja um starvsfólkaliðið í mun til játtanina í 2011. 
Keyp av vørum, tænastum og útbúnaði, sum ikki eru treyt fyri, at vanliga virksemið ótarnað kann fara fram, mugu ikki fremjast. 
Eingi nýggj tiltøk mugu setast í verk. Fyri játtanir av játtanarslagnum Lógarbundin játtan heldur virksemið fram sambært galdandi lóggávu. Eingi nýggj tiltøk mugu setast í verk. Fyri játtanir av játtanarslagnum »Løgujáttan« skal vegleiðandi bert løguvirksemi halda fram, sum er sáttmálabundið, ella sum á annan hátt er átikin skylda. Eingi nýggj tiltøk mugu setast í verk. Fyri játtanir av játtanarslagnum »Stuðulsjáttan« er tað bert virksemi, sum bindandi tilsøgn er givin um, og studningur til rakstur av almennum virksemi av áhaldandi slagi, sum heldur fram. 
Eingi nýggj tiltøk mugu setast í verk.«