Enn einaferð gjørdi Óli Mittún vart við seg í Champions League.

Undan bólkafinaluni í innleiðandi bólki D móti Sporting Lissabon høvdu Óli Mittún og liðfelagarnir longu tryggjað sær pláss í millumumfarinum.

Í kvøld tapti GOG í Svendborg Arena 35-37 fyri Sporting Lissabon, ið var á odda 16-11 í steðginum.

Óli skoraði 11 mál upp á 14 málroyndir, og hann var saman við Manuel Zehnder toppskjútti hjá GOG. Óli legði eisini upp til fýra mál.

Sporting Lissabon vann bólk D við 11 stigum. GOG hevur sjey stig á øðrum plássinum, og Szeged hevur seks stig á triðja plássinum. Kristianstad endaði aftast við ongum stigi.

Í innleiðandi bólki A vunnu Hákun West av Teigum og liðfelagarnir í Füchse Berlin 40-33 á Partizan Beograd. Í steðginum var Partizan á odda 18-17.

Hákun skoraði tvey mál upp á tríggjar málroyndir.

Veszprem vann bólk A við 12 stigum. Füchse Berlin er nummar tvey við átta stigum, og vinnur seg eisini víðari til millumspælið. Porto hevur trý stig, og Partizan Beograd endaði aftast við einum stigi.

Klokkan 19.45 spæla Jóhan á Plógv Hansen og liðfelagarnir í Skanderborg-Aarhus dyst á heimavølli í innleiðandi E móti stórliðnum, Barcelona. Skanderborg-Aarhus skal hava stig fyri við vissu at tryggja sær annað plássið í bólkinum.

Undan seinasta umfarinum hevur Barcelona 10 stig. Skanderborg-Aarhus hevur fimm stig, Dinamo Bukarest hevur trý stig, og Montpellier hevur tvey stig.