Tvey føroyingalið vóru í leiki í bestu íslendsku hondbóltsdeildini hjá kvinnum í kvøld.

Inga Maria Roysdóttir (myndin) stóð fyri einum ótrúligum avriki, tá lið hennara, Stjarnan á heimavølli tapti 25-34 (11-16) fyri verandi meistarunum, Vali.

Inga Maria skoraði meir enn helvtina av málunum hjá Stjörnuni. Inga Maria skoraði 13 mál upp á 18 málroyndir. Hon setti átta av átta brotskøstum í netið. Harumframt legði hon upp til sjey mál, og so vann hon eisini liðnum trý brotskøst. Inga Maria var sjálvsagt vald at vera besti leikarin á vøllinum.

Stjarnan er aftast í deildini við tveimum stigum fyri sjey dystir.

Joan R. Johannesen, Agatha Kjærbæk og liðfelagarnir í KA/Þór vunnu á útivølli í Kópavogi 27-24 á HK. Í steðginum var støðan javnleikur 11-11.

Joan og Agatha vóru effektivar í kvøld. Tær skoraðu báðar fýra mál upp á fýra málroyndir, og báðar løgdu upp til eitt mál.

KA/Þór er nummar átta í deildini við fýra stigum.