Fyrrverandi danski uttanríkisráðharrin, Per Stig Møller, heldur ikki, at tað var rætt av danska forsætisráðharranum, Mette Frederiksen, alment at finnast at norska forsætisráðharranum og finska forsetanum fyri at hava tosað í telefon við russiska forsetan, Vladimir Putin.
Tað var í vikuni, at Alexander Stubb, sum er finskur forseti og Jonas Gahr Støre, sum er norskur forsætisráðharri, saman tosaðu í telefon við russiska forsetan í hálvan annan tíma.
Per Stig Møller heldur ikki, at Mette Frederiksen alment skuldi funnist at Noregi og Finnlandi fyri samrøðuna við Vladimir Putin.
Danski forsætisráðharrin kallaði telefonsamrøðuna eitt "solo-átak", sum ikki var samskipað við restina av Evropa, og tískil segði hon seg vera ógvuliga ivingarsama um norska og finska átakið.
Fyrrverandi danski uttanríkisráðharrin, Per Stig Møller, rópar útsagnirnar hjá Mette Frederiksen ein diplomatiskan brølara, og hetta sigur hann við donsku ávísina, Politiken.
- Hon skuldi havt sagt: Umskylda, Støre og Stubb, eg vil faktiskt fegin, at vit umrøða hetta aftanfyri stongdar dyr. So, kundi hon havt leikað í, um tað var tað, hon ynskti. Men, tað er ikki rætt at gera hetta alment, sigur Per Stig Møller.
Professarin, Mikkel Vedby Rasmussen, sum starvast við Institut for Statskundskab á Keypmannahavnar Universiteti, er samdur við fyrrverandi danska uttanríkisráðharran.
- Diplomati snýr seg nógv um at viga síni orð á einari vágskál og síðan bera tey fram á rættan hátt og í røttu løtuni, og eg dugi ikki at síggja, hvat endamálið var við hørðu atfinningunum, sigur hann.
Professarin vísir á, at Danmark fekk stóra nyttu burtur úr, at Norðurlond stóðu saman við Danmark um Grønland.
- At Norðurlond standa saman úteftir hevur eisini stóran týdning í viðurskiftunum við Russland - líka mikið, hvussu stór ósemjan annars kann vera, sigur danski professarin, Mikkel Vedby Rasmussen.
