Morgunblaðið skrivar, at Laxey hevur gjørt fyrstu royndirnar við nýggjari tøkni, sum skal turka evju frá alivinnuni og gera hana til eina vøru, sum kann brúkast víðari, millum annað sum tøð.

Endamálið er at fáa meira virði burtur úr tí, sum annars hevði verið eitt burturkast frá framleiðsluni.

Laxey hevur eisini fingið sín laks inn á matarlepan hjá Michelin-matstovuni Kadeau í Keypmannahavn. Tað er partur av arbeiðinum við at byggja upp eitt sterkari vørumerki kring íslendskan laks og røkka inn á marknaðir, har góðska og uppruni hava stóran týdning.

Hyggja móti Kina

Samstundis arbeiðir felagið við møguleikunum á kinesiska marknaðinum.

Ætlanin er, at vikuligar beinleiðis fraktflúgvingar millum Ísland og Kina skulu byrja í oktober. Tað kann gera tað munandi lættari at flyta feskan laks skjótt úr Íslandi til kinesiska marknaðin.

Kina er ein stórur og vaksandi marknaður fyri laks, og beinleiðis flogfrakt kann geva íslendskum framleiðarum ein fyrimun, tá tað ræður um skjótleika og feska vøru.

Kapping eisini við føroyskan laks

Menningin er eisini áhugaverd úr føroyskum sjónarhorni.

Føroyska alivinnan selur somuleiðis stórar nøgdir av laksi á altjóða marknaðinum, og bæði Føroyar og Ísland kappast um kundar, sum leggja dent á góðsku, uppruna og skjóta levering.

Ísland hevur seinastu árini økt munandi um alivinnuna, og við nýggjari tøkni, sterkari marknaðarføring og betri flutningsmøguleikum royna íslendsku framleiðararnir nú at skapa størri virði úr hvørjum kilo av laksi.

Laxey er eitt dømi um hesa gongdina, har bæði framleiðsla, burðardyggari gagnnýtsla og marknaðarføring verða løgd saman í eina strategi fyri at styrkja støðuna hjá íslendskum laksi, skriva íslendskir miðlar.