Í hesi løtu er stákan og fagnaður í NSÍ leguni, nú tað verður fyrireikað at fara út á Svangaskarð at seta punktum fyri hesum árinum. Uttan mun til, hvussu úrslitið verður í dag, so er tað greitt, at NSÍ er føroyameistari, og at FM steyp og gullkrónur seinnapartin vera í viðførinum inn aftur um Rókina.
Eftir kappingarlok í fjør, tá ið NSÍ endaði á triðja plássi við 60 stigum og var 13 stig frá meistaraliðnum KÍ varð tað í NSÍ leiðsluni mett at vera neyðugt at styrkja um hópin – bæði uttanfyri vøllin og á vøllinum.
Í Sosialinum hesa ferð stendur millum annað soleiðis:
Tað var mett neyðugt at finna nýggjan meistaravenjara. Valið varð íslendski Sigurður Ragnar Eyjólfsson. Hóast hann hevur verið meistari í at flúgva undir radaranum, so ivast eingin í, at hann eigur avgerandi týdning í meistaraheitinum. Sjálvur vendir hann fokus aðrar vegir, tá ið hann millum annað sigur um løtuna sunnudagin, tá ið tað á heimavølli ímóti HB endaði 1-1, og tað var greitt, at NSÍ er meistari:
-Eg sá alt liðið vera við í útjavnandi málinum. Eg sá okkum øll á og kring liðið røkka málinum, sum vit settu okkum fyri einum ári síðani, tá ið eingin roknaði við okkum, og eg havi sæð eitt lið, sum ongantíð gav skarvin yvir, og sum nú hevur fingið løn fyri stríðið.
Nýggir spælarar í vár vóru Viljormur Davidsen, Marius Kryger Lindh, Alex Elísson, Tom Amos, Tobias Hestad og Filip Drinic. At Viljormur Davidsen flutti aftur til barndómsfelagið bar við sær, at verjuspælið varð væl støðugari, enn tað hevur verið. Í morgin (í dag) fer hann at spæla landskappingardyst nummar 100 í bestu deildini:
-Tað stóð nógv á eina løtu ímóti HB. Vit løgdu væl fyri og høvdu beinanvegin møguleika at skora. Í fyrra hálvleiki høvdu vit tak á spælinum, men tá ið HB eftir ein tíma legði seg á odda, høvdu teir havt takið fyrsta korterið eftir steðgin. So løgdu vit meiri fyri í álopspartinum, og sum so mangan fyrr í ár, so var tað Petur Knudsen, sum skoraði málið til 1-1, sum vísti seg at vera avgerandi, so vit eru meistarar, áðrenn vit fara út á Toftir, staðfesti Viljormur Davidsen.
Og tað ber til at ímynda sær, hvussu tað hevði tørnað út í ár, um Viljormur heldur enn at flyta aftur til barndómsfelagið gjørdi av at halda fram í HB, har hann spældi í 2023, 2024 og 2025.
Tað ber ikki til at enda gjøgnumgongdina av nýggja meistaraliðnum og ferðini frá niðurflytingini í 2022 og fram til FM heitið í 2026 uttan at nevna mannin undir liðini á meistaravenjaranum. Tá ið Sigurður Ragnar Eyjólfsson kom úr Íslandi og til Runavíkar, kendi hann av góðum grundum ikki so nógv til føroyskan fótbólt, sum føroyingar gera. Tí var tað ógvuliga kærkomin stuðul, sum formaðurin syrgdi fyri, at Raggi fekk, tá ið Pól Thorsteinsson varð hjálparvenjari. Pól spældi í síni tíð 240 landskappingardystir í bestu deildini. Hann var við til at vinna FM við B36 í 2001 og 2005, og burtursæð frá tíðarskeiðnum tíðliga á árinum, tá ið hann var skaddur, so var Pól lyklaspælari, tá ið NSÍ í 2007 vann FM fyri fyrstu ferð. Síðani 2023 og fram til í fjør var hann venjari í FC Suðuroy, og nú hevur hann við sínum dygdum, royndum og innliti verið avgerandi næsti maður hjá Sigurði Ragnar Eyjólfsson.
