Eitt stórt bjargingarátak varð sett í verk, eftir at tað gjørdist greitt, at eldur var í einum fiskiskipi í Skagerak.
Tey fýra sjófólkini, sum vóru í bátinum, eru øll bjargað og hava tað eftir umstøðunum gott.
Millum miðlarnar, sum skriva um hendingina í dag, er Verdens Gang.
Sagt verður, at eitt stórt italskt cruiseskipið, AidaNova, sum var á leiðini, hevði tikið manningina á fiskiskpinum umboð.
Við egnari hjálp var manningin sloppin av brennandi skipinum og í ein lívbát.
- Tað er eitt fiskiskip, sum er miðskeiðis millum Danmark og Noreg. Tað tykist, sum eldur er ískipinum, og roykur er staðfestur.
Soleiðis segði bjargingarleiðarin á norsku Høvuðsbjargingarstøðini, Per Ivar Austnaberg, við Verdens Gang í dag klokkan 15.10, lokala tíð.
Bert 25 minuttir seinni upplýsir bjargingarleiðarin yvirfyri VG, at øll fýra sjófólkini, sum vóru við brennandi skipinum, eru bjargað.
Lagt verður aftrat, at fiskiskipið sigldi undir donskum flaggi, men Verdens Gang visti fyrr í dag ikki at siga, hvør tjóðskapurin er hjá teimum bjargaðu.
Ógreitt var eisini, hví eldur var komin í fiskiskipið, og hvør lagnan hjá skipinum gjørdist.
