Í trý samdøgur sat ein reingerðarkvinna innilæst í einum fongsulskliva í einum av gomlu bygningunum hjá Eystara Landsrætti í Bredgade í Keypmannahavn.

Tað skrivar Ekstra Bladet sambært Ritzau.

Óhappið hendi mikukvøldið 16. september, tá hurðin til klivan small aftur aftan fyri kvinnuna. Hon hevði onga fartelefon uppi á sær, og hurðin kundi ikki latast upp innanífrá.

Eystari Landsrættur flutti í februar 2022 í nýggjan bygning í Nordhavn. Síðani hevur býarrætturin í Keypmannahavn av og á brúkt gomlu hølini, men annars standa bygningarnir sambært Ekstra Bladet tómir.

Tí var eingin, sum varnaðist, at kvinnan sat innilæst.

Tá maður hennara kom heim leygardagin, undraðist hann á, hvar hon var, og fór at leita eftir henni. Uttan fyri gamla landsrættarbygningin sá hann súkklu hennara og boðaði løgregluni frá.

Kvinnan varð funnin og hjálpt úr klivanum. Síðani varð hon koyrd á sjúkrahús.

Jens Stausbøll, dómari og fjølmiðlasamskipari hjá býarrættinum í Keypmannahavn, váttar hendingina fyri Ekstra Bladet, men vil ikki gera fleiri viðmerkingar.

Reingerðarfyritøkan Coor, har kvinnan arbeiðir, váttar eisini tilburðin.

Sambært Ekstra Bladet fekk kvinnan boðið kreppuhjálp. Hon er síðani farin aftur til arbeiðis.

/ritzau/